Óńirlerge suıytylǵan gaz bólý protsesi avtomattandyrylady

ASTANA. KAZINFORM — Premer-mınıstr Oljas Bektenov Energetıka mınıstrligi men oblys ákimderine suıytylǵan gaz bólý protsesi avtomattandyrýdyń usynystaryn bir aıdyń ishinde ázirleýdi tapsyrdy.

— Óńirlerdiń suıytylǵan munaı gazyna degen qajettilikterin qalyptastyrý jáne ony bólý protsesterin tsıfrlandyrý máselesine de nazar aýdarý kerek. Búginde ol qolmen atqarylady ári mundaı tetiktiń ashyq bolmaýy sybaılas jemqorlyq táýekelderine alyp keledi. Sondyqtan bul protsesti tsıfrlandyryp, barlyq qatysýshyǵa túsinikti bolatyndaı etý qajet, — dedi ol.

Bul jumysty baqylaý men úılestirý Premer-mınıstrdiń birinshi orynbasary Roman Sklıarǵa júkteldi.

— Energetıka mınıstrligine jáne óńir ákimderine suıytylǵan gazdy bólý protsesterin avtomattandyrý boıynsha bir aı merzimde naqty usynystar engizýdi tapsyramyn, — dedi Úkimet basshysy.

Eske salsaq, Prezıdent Qasym-Jomart Toqaev Jańaózen gaz óńdeý zaýyty qurylysynyń keshigýin Úkimettiń óreskel olqylyǵy retinde baǵalaǵan edi. 

Osyǵan deıin Premer-mınıstr Oljas Bektenov QazaqGaz ulttyq kompanııasynyń basqarma tóraǵasy Sanjar Járkeshevke saladaǵy problemalardy ashyp aıtpaǵany úshin eskertý jasady.

Al «Samuryq-Qazynaǵa» Jańaózendegi gaz óńdeý zaýytyn tezdetip salýdy tapsyrdy.

Sonymen qatar Qazaqstan 3 aıda 17,2 mlrd tekshe metr gaz óndirgeni belgili boldy.

Qazir QazaqGaz 535,5 mlrd tekshe metr gaz qory bar 15 ýchaskeni barlap jatyr.

Taýarlyq gazǵa arnalǵan «áleýmettik ámııan» gazdandyrylǵan óńirlerdiń bárine taratylatyn boldy.