Óńirlerge 34,5 myń bas mal satyp alýǵa 43 mlrd teńge baǵyttaldy - AShM

Aıdarbek Saparov memleket tarapynan mal sharýashylyǵyn damytýǵa qajetti barlyq qarjylyq múmkindikter jolǵa qoıylǵanyn atap ótti.

Keshendi jospar aıasynda «Igilik», «Bereke» jáne «Jaılaý» jeńildetilgen nesıe baǵdarlamalary iske asyrylý ústinde. Sonymen qatar salanyń barlyq baǵyty boıynsha aınalym qarajatyn tolyqtyrýǵa arnalǵan jeńildetilgen nesıeleý kólemi keńeıtildi.

-Biz fermerlerdiń usynys-tilekterin eskerip, áleýmettik-kásipkerlik korporatsııalar arqyly qarjylandyrylatyn baǵdarlamalarǵa qatysý talaptaryn edáýir jeńildettik. Endigi mindet – óńirlerde jobalardy sapaly irikteý. Memlekettik qarajattyń tıimdi ıgerilýi men jeńildetilgen nesıelerdiń qaıtarymdylyǵy úshin oblys ákimdikteri janynan qurylǵan komıssııalar men qarjy ınstıtýttary jaýapty bolady. Sondyqtan barlyq táýekel jaǵdaılar aldyn ala jan-jaqty pysyqtalyp, árbir joba qarjylandyrý týraly sheshim qabyldanǵanǵa deıin muqııat saraptalýy tıis, – dedi mınıstr.

Aýyl sharýashylyǵy vıtse-mınıstri Amanǵalı Berdalınniń aıtýynsha, óńirlerge 34,5 myń bas aýyl sharýashylyǵy janýaryn satyp alýǵa 43 mlrd teńge baǵyttalǵan.

Sonymen birge birqatar óńirde jobalardy qaraý jáne iske asyrý qarqyny áli de tómen. Osyǵan baılanysty Aıdarbek Saparov jumysty jedeldetýdi, árbir jobany jeke súıemeldeýdi qamtamasyz etýdi jáne iske asyrýǵa tolyq daıyn emes jobalarǵa memleket qarjysyn baǵyttamaýdy tapsyrdy.

Keńeste iri eginshilik sharýashylyqtaryn mal sharýashylyǵyn damytýǵa tartý máselesine de erekshe nazar aýdaryldy. Búginde Qazaqstanda jer kólemi 10 myń gektardan asatyn, alaıda jetkilikti jer qory men óndiristik áleýetine qaramastan malmen aınalyspaıtyn sharýashylyǵy 329 jer paıdalanýshy bar.

-Bul sharýashylyqtardyń mal sharýashylyǵyn damytyp, tolyqqandy óndiristik tizbekti qalyptastyrýǵa áleýeti jetkilikti. Bul – Memleket basshysynyń, sonymen qatar, Premer-mınıstrdiń naqty tapsyrmasy. Sondyqtan ákimdikter osyndaı kásiporyndarmen jumysty qysqa merzimde jandandyrýy qajet, – dedi Aıdarbek Saparov.

Keńeste aldaǵy mal qystatý naýqanyna daıyndyq barysy da qaraldy. Óńirlerdiń málimetine sáıkes, búgingi tańda 16 mln tonna mal azyǵy daıyndalǵan. Degenmen keıbir oblystarda mal azyǵyn daıyndaý qarqyny josparlanǵan deńgeıden tómen.

Keńes qorytyndysynda mınıstr óńirlerge 2030 jylǵa deıingi Mal sharýashylyǵyn damytýdyń keshendi josparyn sapaly iske asyrýdy, ınvestıtsııalyq jobalardy súıemeldeýdi kúsheıtýdi, iri jer paıdalanýshylardy mal sharýashylyǵyn damytýǵa belsendi tartýdy, sondaı-aq mal azyǵyn daıyndaý qarqynyn jedeldetip, qolda bar shabyndyq alqaptardy tıimdi paıdalanýdy jáne aldaǵy qysqy kezeńge qajetti jemshóp qoryn ýaqytyly qolǵa alýdy tapsyrdy.

Keńeske qarjy ınstıtýttarynyń, QR Aýyl sharýashylyǵy mınıstrliginiń qurylymdyq bólimsheleri basshylary jáne oblys ákimderiniń orynbasarlary qatysty.

Aıta keteıik, búgin Aýyl sharýashylyǵy mınıstri Aıdarbek Saparovtyń tóraǵalyǵymen arnaıy keńes ótip, onda 2026 jylǵy qańtar–shilde aılary boıynsha agroónerkásip kesheniniń ekonomıkalyq ósimin qamtamasyz etý máseleleri qaraldy.