Óńirlerdiń úni Quryltaı men Halyq Keńesi arqyly jetedi — Toqaev
ASTANA. KAZINFORM — Aımaqtardyń múddesin respýblıkalyq deńgeıde kóterýde Halyq Keńesiniń róli artady. Bul týraly Memleket basshysy Qasym-Jomart Toqaev Qazaqstan Halyq Keńesiniń birinshi sessııasynda aıtty.
Prezıdent Halyq Keńesiniń taǵy bir mańyzdy mindeti — aımaqtarmen tyǵyz baılanys ornatyp, olardyń múddesin qorǵaý ekenin eske saldy.
— Ózderińizge málim, Keńestiń úshten bir bóligi — aımaqtan kelgen ókilder. Olardyń qatarynda máslıhat depýtattary men qoǵamdyq keńes músheleri bar. Bul — jergilikti jerdegi máseleler respýblıkalyq deńgeıde kóteriledi degen sóz, — dedi Memleket basshysy.
Prezıdent qoǵamda «Senat jumysyn toqtatqan soń óńirlerdiń múddesi eskerýsiz qala ma?», degen suraq bolýy múmkin ekenin jasyrmady. Biraq, alańdaýǵa esh negiz joq.
— Aımaqtardyń úni budan bylaı Quryltaı men Halyq Keńesi arqyly memlekettik organdarǵa jetetin bolady. Aýylda, aýdanda, oblysta naqty isimen halyqtyń yqylasyna, qurmetine ıe bolǵan azamattar az emes. Halyq Keńesi osyndaı myqty tulǵalardy elge tanytyp, olardyń qabiletin odan ári shyńdaýǵa múmkindik beretin mekeme bolmaq. Men buǵan kámil senemin, — dedi Q. Toqaev.
Máslıhattar Parlamentpen tyǵyz baılanysta jumys isteıdi. Olar aımaqtaǵy máselelerdi ortalyqqa jetkizip, zańdardy jetildirýge qatysty óz usynystaryn turaqty túrde berip otyrady.
Buǵan deıin Prezıdent 1 jylda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
Qasym-Jomart Toqaev Qazaqstannyń 7 jyldaǵy negizgi kórsetkishterin atady.
Sondaı-aq Halyq Keńesi men Quryltaı bir-biriniń jumysyna aralaspaıdy.
