Óńirlerdiń óz kirisi artty: bıýdjetten qansha qarajat bólinedi
ASTANA. KAZINFORM — Elimizde óńirlerdi qoldaýǵa jyl saıyn bıýdjettiń tórtten bir bóligi nemese 7,4 trln teńge (24,8%) jiberiledi. Bul týraly Qarjy vıtse-mınıstri Abzal Beısenbekuly baıandady.
— Aıta ketetin jaıt, óńirlerge jiberetin barlyq qarajat — eń aldymen halyqqa arnalady. Bul úılerdegi sý men jylý, jaqsy joldar, mektepter men aýrýhanalar, gazdandyrý jáne kommýnaldyq ınfraqurylymdy bildiredi. Bizdiń mindetimiz — halyqtyń jaıly ómir súrýine jaǵdaı jasaý, — dedi Abzal Beısenbekuly Quryltaıda ótken bıýdjet tanystyrylymynda.
Bul rette respýblıkalyq bıýdjetten beriletin transfertter ǵana emes, óńirlerdiń ózindik qarjylyq múmkindikterin keńeıtý arqyly da qoldaý kórsetilip keledi.
Máselen 2020-2025 jyldary jergilikti bıýdjetterge jalpy somasy 7,2 trln teńgege salyqtar men tólemderdiń 6 túri berildi.
— 2026 jyldan bastap tólemderdiń taǵy 6 túri berildi. Osy sharalar jergilikti bıýdjet kiristerin shamamen 100 mlrd teńgege ulǵaıtýǵa múmkindik beredi. 2025 jyldyń qorytyndysy boıynsha óńirlerdiń óz kiristeri 9,3 trln teńgege jetti, bul 2024 jylmen salystyrǵanda 16,3%-ǵa artyq, — dedi Qarjy vıtse-mınıstri.
Jalpy sıpattaǵy transfertter 12 bazalyq baǵyt boıynsha óńirlik standarttar júıesimen baılanystyryldy.
— Osylaısha, biz adamdarǵa qajetti ınfraqurylymǵa qarajat bólemiz jáne óńirlerge jergilikti máselelerdi sheshýge kóbirek ózderiniń qarjylyq múmkindikterin keńeıtýge qolaıly jaǵdaı týǵyzamyz, — dedi A. Beısenbekuly.
Aıta keteıik, Qarjy vıtse-mınıstri Abzal Beısenbekuly Quryltaıda «2027-2029 jyldarǵa arnalǵan respýblıkalyq bıýdjet týraly» Zań jobasyn tanystyrdy.
Elimizde kelesi jyly áleýmettik kómekke 6,9 trln teńge bólinedi.
Sondaı-aq, 11 jastaǵy uldarǵa vaktsına salynady.
