Túrkııa qorǵanys kórmesinen túsken tabysty dron ortalyqtaryn damytýǵa jumsamaq
ASTANA. KAZINFORM - Túrkııa bıligi men qorǵanys-ónerkásip kesheni ókilderi «SAHA 2026» kórmesinen túsetin qarajatty el boıynsha dron óndirisi men oqytý jelisin keńeıtýge baǵyttaýdy josparlap otyr. Bul týraly Kazinform agenttiginiń Ankaradaǵy menshikti tilshisi habarlady.
Jyl saıyn ótetin qorǵanys-avıatsııa kórmesiniń tabysy Túrkııanyń barlyq 81 provıntsııasynda ushqyshsyz ushý apparattaryn óndirý jáne mamandar daıarlaý ortalyqtaryn ashýǵa jumsalmaq. Bul jóninde «Baıkar» kompanııasynyń bas dırektory Halýk Baıraktar málimdedi.
Onyń aıtýynsha, bastamanyń negizgi baǵyty – eldiń barlyq óńirinde drondar qurastyrý men operatorlardy oqytatyn ortalyqtar jelisin qalyptastyrý. Eń iri ortalyq Ystanbulda ornalasady. Bul nysandar kópshilikke, ásirese jastarǵa ashyq bolady. Munda drondardy qurastyrý, synaqtan ótkizý jáne basqarý daǵdylaryn meńgerýge múmkindik beriledi.
«SAHA 2026» kórmesi 5–9 mamyr aralyǵynda Ystanbulda ótedi. Bul – atalǵan sharanyń besinshi ret uıymdastyrylýy.
Uıymdastyrýshylardyń málimetinshe, 2018 jyldan beri kórme aýqymy aıtarlyqtaı keńeıgen. Bıyl oǵan 1700-den astam kompanııa, onyń ishinde shamamen 260 sheteldik qatysady dep kútilip otyr. Kelýshiler sany 200 myńnan asýy múmkin.
Halýk Baıraktar «SAHA Istanbul» búginde 1300-den astam qatysýshyny biriktiretin Eýropadaǵy iri ónerkásiptik klasterge aınalǵanyn atap ótti.
Onyń dereginshe, kórme aıasynda jasalǵan eksporttyq kelisimsharttardyń kólemi 2024 jyly 6,2 mlrd dollardy quraǵan. Al bıyl bul kórsetkishti 8 mlrd dollarǵa jetkizý josparlanyp otyr.
Osyǵan deıin Túrkııada ashylmaǵan qylmystardy qaıta qaraıtyn jańa bólim qurylatyny týraly jazdyq.