Óńirlerden iriktelgen daryndy oqýshylar halyqaralyq bilim granttaryn ıelendi
ASTANA. KAZINFORM – Qazaqstannyń túrli óńirinen shyqqan daryndy oqýshylar Halyqaralyq bakalavrıat (IB) baǵdarlamasy boıynsha tegin bilim alý múmkindigine ıe boldy. Bıyl bul mártebeli grantqa irikteýden súrinbeı ótken 17 oqýshy laıyq dep tanyldy.
Astana men Almaty qalalaryndaǵy MIRAS halyqaralyq mektepterinde daryndy joǵary synyp oqýshylaryna arnalǵan bilim granttaryn tabystaý saltanaty ótti. Baǵdarlama 2021 jyldan beri NNEF qoǵamdyq qory men Tımýr Qulybaev jetekshilik etetin Halyk qaıyrymdylyq qorynyń birlesken jobasy aıasynda júzege asyp keledi.
100 paıyzdyq grant ıegeri Janııa Jomart baıqaý birneshe kezeńnen turǵanyn aıtty.
– Іrikteý barysynda aǵylshyn jáne orys tilderinen, sondaı-aq matematıkadan test tapsyryp, suhbattan óttik. Maǵan fızıka-matematıka baǵyty erekshe unaıdy. Esep pen teńdeýler sheshýdi jaqsy kóremin. Halyqaralyq baǵdarlama boıynsha oqý maǵan jańa dostar, bilikti ustazdar men sheksiz múmkindik syılady. IB júıesi jan-jaqty damýǵa jáne halyqaralyq olımpıadalarǵa qatysýǵa jol ashady, - deıdi ol.
Janııa aldaǵy ýaqytta ınjenerııa salasy boıynsha sheteldik joǵary oqý ornyna túsip, bilimin jetildirip, keıin týǵan eline oralyp, el ıgiligine eńbek etýdi maqsat etedi.
Halyk qorynyń basqarýshy dırektory Narıman Ábilshaıkovtiń aıtýynsha, daryndy balalardy qoldaý – qor jumysynyń negizgi baǵytynyń biri.
– 2021 jyldan beri biz jyl saıyn talantty oqýshylarǵa 100 paıyzdyq oqý granttaryn bólip kelemiz. Bıyl baıqaýǵa elimizdiń túkpir-túkpirinen 2000-nan astam 9–10-synyp oqýshysy qatysty. Sonyń ishinde 17 oqýshy bilim grantyna ıe boldy. IB baǵdarlamasynyń túlekteri únemi joǵary nátıjeler kórsetip, sheteldiń jetekshi ýnıversıtetterinen shaqyrtýlar alyp júr, - dedi ol.
Bes jyl ishinde bul jobaǵa 5 000-nan astam mektep oqýshysy qatysqan. Jalpy NNEF jáne Halyk qorlary barlyǵy 70 bilim grantyn tabystaǵan. Astanadaǵy MIRAS mektebiniń dırektory Elena Hamıtova baıqaýǵa qatysýshylardyń geografııasy jyl saıyn keńeıip kele jatqanyn atap ótti.
– Keıingi jyldary shalǵaı óńirlerden kelip, óz darynymen erekshelengen balalardyń qatary kóbeıdi. Bizdiń grant ıegerlerimiz – tek úzdik oqýshylar ǵana emes, sonymen qatar volonterlikpen aınalysatyn, qoǵamǵa paıdaly jobalardyń bastamashylary, - dedi ol.
Aıta ketsek, NNEF qorynyń bilim berý uıymdary 1999 jyly Dınara Qulybaevanyń bastamasymen qurylǵan jáne búginde Halyqaralyq bakalavrıattyń úsh deńgeıi – bastaýysh, negizgi jáne joǵary mektep baǵdarlamalary boıynsha akkredıttelgen. Qazirgi tańda álemde 661 IB mektebi bar, olardyń tórteýi Qazaqstanda jumys isteıdi. 2021–2024 jyldary grant ıegeri atanǵan 37-den astam túlek sheteldiń bedeldi ýnıversıtetterine tolyq nemese ishinara grantpen oqýǵa túsken.
Halyqaralyq baǵdarlama elimizdiń túkpir-túkpirindegi talantty balalarǵa teń múmkindik berip, olardyń áleýetin ashýǵa, zamanaýı bilim alýǵa jáne álemdik arenada óz ornyn tabýǵa jol ashyp otyr.