Óńirlerdegi Tótenshe jaǵdaılar departamentteri kúsheıtiledi
ASTANA. KAZINFORM – Ónerkásiptik qaýipsizdik departamentteri, Órt sóndirý qyzmetteri jáne jedel-qutqarý jasaqtary Tótenshe jaǵdaılar departamentine biriktiriledi. Bul týraly Májiliste Tótenshe jaǵdaılar mınıstri Shyńǵys Árinov aıtty.
«Qazirgi ýaqytta mınıstrliktiń qyzmeti «teorııadan praktıkaǵa» kóshýge baǵyttalǵan. Osyǵan baılanysty halyqty tótenshe jaǵdaılardan qorǵaýdy arttyrý boıynsha sharalar kesheni qabyldandy. Eń aldymen, qyzmetterdiń júıesizdigi Tótenshe jaǵdaılar kezinde jedel den qoıýǵa keri áserin tıgizdi. Osyǵan baılanysty dara basshylyq qaǵıdatyna negizdelgen «vertıkaldy basqarý bıligin» qurý sheshimi qabyldandy. Óńirlerdegi Ónerkásiptik qaýipsizdik departamentteri, Órt sóndirý qyzmetteri jáne jedel-qutqarý jasaqtary Tótenshe jaǵdaılar departamentine biriktiriletin bolady. Bul tótenshe jaǵdaılardyń aldyn alý jáne joıý máselelerin keshendi jáne jedel sheshýge múmkindik beredi», - dedi ol.
Onyń atap ótýinshe, bıyl Memleket basshysynyń tapsyrmasy boıynsha Tótenshe jaǵdaılardyń aldyn alý komıteti quryldy. Sýdaǵy tabıǵı jáne tehnogendik sıpattaǵy tótenshe jaǵdaılarǵa jedel den qoıý úshin alǵash ret «Teńiz jasaǵy» jáne TJ aımaqtarynda gýmanıtarlyq júkterdi qorǵaýǵa arnaıy maqsattaǵy «Aıbat» bólimshesi quryldy.
«Mınıstrliktiń apparatynda Tótenshe jaǵdaılardy boljaý, modeldeý jáne taldaý úshin zamanaýı tsıfrlyq júıelerimen jabdyqtalǵan Komandalyq ortalyq quryldy. Ol Jedel shtabtyń fýnktsııalaryn júzege asyrýmen qatar, eldegi jedel jaǵdaıdy basqaryp, qajet bolǵanda qosymsha kúshter men quraldardy ulǵaıtady. Almaty, Oral, Óskemen jáne Qostanaı qalalarynda qaýipsizdikti nyǵaıtý úshin TJM áskerı bólimderi esebinen qutqarý batalondary jasaqtaldy. Bul tótenshe jaǵdaılardy jedel joıýǵa jáne qarjylyq shyǵystardy qysqartýǵa múmkindik berdi. Órtke qarsy qyzmet komıtetine qadaǵalaý fýnktsııalary qaıtaryldy. Bul qaýip-qaterlerge jedel den qoıýǵa jáne elimizdegi órt qaýipsizdigin birtindep jaqsartýǵa múmkindik beredi. Basty nazar tabıǵattaǵy tutaný oshaqtaryn erterek anyqtaýǵa jáne órtterdiń aldyn alýǵa aýdaryldy. Máselen, orman qoryn táýlik boıy baqylaý úshin Komandalyq ortalyqta «Orman» jáne «Tabıǵat» beınebaqylaý júıeleri qosyldy», - dedi mınıstr.
