Óńirlerdegi tasqynnan keıin sýdyń sapasyn tolyqtaı tekserý kerek - maman

ASTANA. KAZINFORM – Sý sharýashylyǵy salasynyń ardageri, ınjener-gıdrotehnık, Halyqaralyq Araldy qutqarý qorynyń Qazaqstandaǵy atqarýshy dırektsııasynyń bas mamany Ámirhan Kenshimov tasqynnan keıingi sý sapasynyń ózgerýi jaǵdaıyna pikir bildirdi.

«Meniń oıymsha, sýdyń sapasyn zertteý biraz jerde júrgizilgen joq. Óıtkeni, munyń bári belgili bir dárejede kútpegen jaǵdaı boldy. Jalpy, sý basatyn óńirlerde sý sapasyna saraptama jasaý qajet. Sý basqan aımaqtarda daladaǵy dárethanalar da, septıkter, káriz júıesi de kóp boldy. Munyń bári sý astynda qaldy. Ekinshiden, kóptegen mal sýǵa batty. Eger ólekseler der kezinde tabylyp joıylmasa, bul da qaýip tóndiredi. Bul jaǵdaıda indettiń taralý qaýpi artady. Sonymen qatar, hımııalyq zattar men tyńaıtqyshtardyń qoımalary da sý astynda qalýy yqtımal», - dedi Á. Kenshimov Kazinform tilshisine bergen suhbatynda.

Bul turǵyda ol osyndaı jaǵdaıda mindetti túrde sýdyń sapasyna tolyqtaı saraptama jasaý kerek ekenin atap ótti.

«Biz tasqyn sýdyń qaıda aǵyp barǵanyn qaraýymyz kerek. Eger qaıtadan ózenderge tússe, onda synamalardy sol jerden alý qajet. Ózenderde gıdrohımııalyq beketter bar, onda júıeli túrde sýdyń sapasyna taldaý jasalýy kerek. Kaspıı teńizi men kólderge biraz sý aǵyp bardy. Sondyqtan olardyń sapasyn tekserý myńyzdy. Munyń bári aýqymdy jumys jáne oǵan qomaqty qarajat kerek. ıAǵnı, osy jumystar neǵurlym jyldam bastalsa, soǵurlym tezirek aýrýdyń taralýyn boldyrmaý múmkindigi jasalady. Osynyń barlyǵyn tekserý kerek. Bul protseske tek gıdrometeorologııalyq stantsııalardy ǵana emes, sonymen qatar veterınarlyq zerthanalar men sanıtarlyq-epıdemıologııalyq qyzmetterdi de tartý kerek sııaqty», - dedi maman.