Óńirlerdegi pandýstardyń kóbi talapqa saı emes — depýtat
ASTANA. KAZINFORM — Májilis depýtaty Elnur Ábdıev Premer-Mınıstrdiń orynbasary – Mádenıet jáne aqparat mınıstri Aıda Balaevaǵa joldaǵan depýtattyq saýalynda óńirlerdegi ınklıýzıvti ortanyń sapasyna qatysty másele kóterdi.
Depýtattyń aıtýynsha, «AMANAT» partııasynyń «Kedergisiz keleshek» jobasy 12 jyldan astam ýaqyt boıy múgedektigi bar azamattar men júrip-turýy shekteýli jandar úshin qoljetimdi orta qalyptastyrý baǵytynda júıeli jumys júrgizip keledi. Soǵan qaramastan,depýtat óńirlerdegi ahýal áli de ózekti bolyp otyrǵanyn aıtty.
— Qazir elimizde qalyptasyp jatqan «kedergisiz orta» kóp jaǵdaıda tek qaǵaz júzindegi jumys sııaqty kórinedi. Óńirlerde tehnıkalyq talapqa saı kelmeıtin, azamattardyń paıdalanýyna yńǵaısyz pandýstar áli de kóp, — dedi Elnur Ábdıev.
Ol muny jobalaý kezeńinen bastap nysandy paıdalanýǵa bergenge deıingi baqylaýdyń álsizdigimen baılanystyrdy. Sondaı-aq ol 2026 jylǵy 21 sáýirde ótken Úkimet otyrysynda Premer-Mınıstr Oljas Bektenovtiń de ákimdikterdiń jumysyna syn aıtqanyn eske saldy.
— Nysandardy beıimdeý máselesine kóp jaǵdaıda ústirt qaraıdy, — dedi depýtat.
Elnur Ábdıevtiń aıtýynsha, 2030 jylǵa qaraı «qadamdyq qoljetimdilik» talaptaryna saı keletin ınfraqurylym nysandarynyń úlesin 70 paıyzǵa jetkizý josparlanyp otyr.
Alaıda ol naqty baqylaý men laýazymdy tulǵalardyń jeke jaýapkershiligi kúsheımeıinshe, bul mejege jetý qıyn bolatynyn aıtty.
Osyǵan baılanysty depýtattar mınıstrler men oblys jáne aýdan ákimderine qoljetimdi orta qalyptastyrý boıynsha jeke KPI kórsetkishterin engizýdi usynyp otyr.
Aıta keteıik, buǵan deıin múmkindigi shekteýli tulǵalarǵa qyzmet kórsetetin jeke kómekshilerdiń jumys ýaqytyna jańa tártip engizilgenin jazdyq.
