Óńirlerdegi aýrýhanalardy jańǵyrtý aıasynda 23 jańa bólimshe ashyldy - DSM
ASTANA. KAZINFORM - Elimizdiń óńirlerindegi oblystyq aýrýhanalardy aýqymdy jańǵyrtý baǵdarlamasy sheńberinde suranysqa ıe terapııalyq baǵyttar boıynsha 23 jańa bólimshe ashyldy, dep habarlaıdy QR Densaýlyq saqtaý mınıstrliginiń baspasóz qyzmeti.
Jańa bólimsheler eresekter men balalardyń arasynda qajettiligi joǵary medıtsınalyq baǵyttar boıynsha quryldy. Olar: revmatologııa, pýlmonologııa, gastroenterologııa, endokrınologııa, gematologııa, nefrologııa jáne kardıologııa.
Joba 2024–2030 jyldarǵa arnalǵan densaýlyq saqtaý ınfraqurylymyn damytý tujyrymdamasy sheńberinde júzege asyrylyp, óńir turǵyndary úshin mamandandyrylǵan medıtsınalyq kómektiń qoljetimdiligin arttyrýǵa baǵyttalǵan.
Jalpy alǵanda, sheber-josparlarǵa sáıkes elimizdegi 19 oblystyq kópbeıindi aýrýhanada, 15 oblystyq balalar aýrýhanasynda jáne 19 perınataldyq ortalyqta 2700 tósekke arnalǵan 55 jańa bólimshe ashý kózdelgen.
Búgingi kúni olardyń ishinde: 7 revmatologııa bólimshesi; 4 pýlmonologııa bólimshesi; 6 gastroenterologııa bólimshesi; 2 gematologııa bólimshesi; 3 endokrınologııa bólimshesi; 2 nefrologııa bólimshesi; 2 kardıologııa bólimshesi ashyldy.
Oblystyq balalar aýrýhanalarynda 302 tósekke arnalǵan 22 bólimshe ashý josparlanǵan. Onyń ishinde qazirdiń ózinde 168 tósekke arnalǵan 9 bólimshe paıdalanýǵa berildi.
Sonymen qatar pýlmonologııalyq, nevrologııalyq, otorınolarıngologııalyq, ońaltý, travmatologııalyq jáne pallıatıvtik kómekti keńeıtý kózdelgen.
2026 jyldyń 1-shi toqsanynyń qorytyndysy boıynsha elimizdiń oblystyq jáne qalalyq statsıonarlarynda 59 895 patsıent em qabyldady. Bul rette oblystyq deńgeıdegi statsıonarlarda emdelgen patsıentter sany ótken jyldyń sáıkes kezeńimen salystyrǵanda 1 337 adamǵa artty.
-Densaýlyq saqtaý mınıstrligi 2026 jyldyń basynan bastap oblystyq aýrýhanalardy jańǵyrtý baǵdarlamasyn qabyldap, iske asyryp keledi. Bul baǵdarlama densaýlyq saqtaý júıesin keshendi jańǵyrtýdyń bir bóligi bolyp tabylady jáne elimizdiń barlyq óńirleriniń turǵyndaryna sapaly, qaýipsiz ári qoljetimdi mamandandyrylǵan medıtsınalyq kómek kórsetetin zamanaýı medıtsınalyq uıymdar jelisin qalyptastyrýǵa baǵyttalǵan,-delingen habarlamada.
Osyǵan deıin qazaqstandyqtarǵa kardıologııa men onkologııadaǵy terapııanyń jańa ádisteri qoljetimdi bolatyny týraly jazdyq.
