Óńirlerde jańa vokzaldar, sý qubyry, logıstıkalyq hab jáne turǵyn úıler paıdalanýǵa berildi
ASTANA. KAZINFORM – Memleket basshysy Qasym-Jomart Toqaevtyń tapsyrmalaryn iske asyrý aıasynda elimizdiń óńirlerinde ınfraqurylymdy jańǵyrtý, áleýmettik jáne kólik nysandaryn salý, halyqty sapaly aýyz sýmen jáne turǵyn úımen qamtamasyz etý baǵytyndaǵy jumystar jalǵasyp jatyr, dep habarlaıdy Úkimettiń baspasóz qyzmeti.
Ótken aptada elimizdiń birneshe óńirinde jańa ınfraqurylymdyq jobalar iske qosyldy.
Aqmola oblysynda Kýrort – Býrabaı, Aqkól, Makınsk, Shortandy, Jaqsy, Saryoba, Ereımentaý, Erkinshilik, Óleńti, Derjavınsk, Jaltyr jáne Arshaly stansalaryndaǵy temirjol vokzaldaryn rekonstrýktsııalaý aıaqtaldy. Apatty jáne eskirgen ǵımarattardyń ornyna keńeıtilgen kútý zaldary bar jańa keshender salyndy. Injenerlik jeliler men perrondar tolyq jańartylyp, múmkindigi shekteýli azamattarǵa qoljetimdi orta jasaldy. Sondaı-aq zamanaýı jeldetý, aýany baptaý jáne órt qaýipsizdigi júıeleri ornatyldy.
Aqtóbe oblysynda Shalqar jáne Shubarqudyq temirjol vokzaldary jańǵyrtyldy. Qaıta jańartý barysynda ǵımarattardyń qasbeti, shatyry, ınjenerlik jelileri men ishki bólmeleri jóndelip, jańa jıhazdar men jabdyqtar ornatyldy. Sonyń nátıjesinde Shalqar vokzalynyń aýmaǵy 472,8 sharshy metrden 833,6 sharshy metrge, al Shubarqudyq vokzaly 111,2 sharshy metrden 207,3 sharshy metrge deıin ulǵaıdy.
Almaty oblysynyń Іle aýdanynda jylyna 3,5 mln shına saqtaýǵa qaýqarly San Baiserke qoıma kesheni paıdalanýǵa berildi. Nysan TMD aýmaǵyndaǵy shınalardy saqtaýǵa arnalǵan eń iri logıstıkalyq habqa aınaldy. Jalpy aýmaǵy 22,6 gektar bolatyn keshen quramyna qoımalar, qaıta óńdeý zaýyty, servıstik ortalyq, sondaı-aq 180 oryndyq jataqhana men saıabaǵy bar áleýmettik ınfraqurylym kiredi. Logıstıkalyq ortalyq Qazaqstan óńirleri men Ortalyq Azııa elderine ónimdi kóterme jetkizýge múmkindik beredi.
Túrkistan oblysynda uzyndyǵy 39,3 shaqyrym bolatyn «Tama–Tastanbek» toptyq sý qubyry iske qosyldy. Joba nátıjesinde Shardara qalasynyń 31 myńnan astam turǵyny jerasty sý kózderinen alynatyn sapaly aýyz sýmen táýlik boıy qamtamasyz etiledi.
Ulytaý oblysynyń Sátbaev qalasynda halyqtyń áleýmettik osal toptaryna jatatyn 30 otbasy jańa páterdiń kiltin aldy. Joba oblys ákimdigi men Otbasy banki arasyndaǵy yntymaqtastyq týraly kelisim aıasynda júzege asyryldy.
– Memleket basshysynyń tapsyrmalaryn oryndaý sheńberinde óńirlerde ınfraqurylymdy jańǵyrtý, áleýmettik jáne kólik nysandaryn damytý, sondaı-aq halyqty sapaly aýyz sýmen jáne turǵyn úımen qamtamasyz etý baǵytyndaǵy jumystar júıeli túrde jalǵasyp keledi, – delingen Úkimettiń baspasóz qyzmeti taratqan aqparatta.
Aıta keteıik, Qyzylordada 300 oryndyq aýrýhana, Prezıdenttik kitaphana jáne jańa teatr salynyp jatyr.
