Óńirlerde jańa óndiristik, ınfraqurylymdyq jáne áleýmettik nysandar ashyldy
ASTANA. KAZINFORM - Memleket basshysy Qasym-Jomart Toqaevtyń tapsyrmalaryn oryndaý aıasynda el óńirlerinde ónerkásiptik áleýetti damytý, kólik jáne turǵyn úı-kommýnaldyq ınfraqurylymdy jańǵyrtý, sondaı-aq azamattardyń ómir súrý sapasyn jaqsartý boıynsha júıeli jumys júrip jatyr, dep habarlaıdy Úkimettiń baspasóz qyzmeti.
Ótken aptada jańa kásiporyndar, kólik toraptary, sporttyq jáne áleýmettik nysandar paıdalanýǵa berildi.
Ónerkásip
Jambyl oblysynda júgerini tereń óńdeý zaýyty iske qosyldy. Onyń qurylysy 2025 jyldyń sáýir aıynda bastaldy. Birinshi kezeńde shıkizatty qaıta óńdeý qýaty jylyna 500 myń tonnany quramaq. Keıinnen 3 mln tonnaǵa deıin jetkizý josparda bar. Kásiporyn ónimderi tamaq, farmatsevtıka jáne bıotehnologııa salalaryna baǵyttalǵan.
Pavlodarda qýaty jylyna 150 myń tonnaǵa deıin jetetin avtomattandyrylǵan suryptaý kesheniniń birinshi kezegi paıdalanýǵa berildi. Investıtsııa somasy – 5 mlrd teńge. Kásiporyn paıdaly fraktsııalardyń 30%-na deıin (plastık, qaǵaz, karton, shyny, metall, alıýmınıı bankalar jáne t.b.) irikteýge, sondaı-aq komposttaý ádisimen jylyna 60 myń tonnaǵa jýyq organıkalyq qaldyqtardy qaıta óńdeýge múmkindik beredi.
Vokzal ınfraqurylymyn jańǵyrtý
Ulytaý oblysynda tórt temirjol vokzaly – Jezqazǵan jáne Qarajal qalalaryndaǵy, Jańaarqa aýdanyndaǵy jáne Qyzyljar stansasyndaǵy nysandar jańǵyrtýdan keıin paıdalanýǵa berildi. Atap aıtqanda, Jezqazǵan qalasyndaǵy vokzaldyń aýdany 2,5 myń sharshy metrge deıin keńeıtilip, táýligine 2 myń jolaýshyǵa deıin qyzmet kórsetý múmkindigine ıe boldy.
Aqmola oblysynyń Atbasar qalasynda rekonstrýktsııalaý jumystarynan keıin temirjol vokzaly jumysyn qaıta jalǵastyrdy. Onda eski ǵımarattyń ornyna jańa keshen salyndy. Nysannyń aýdany 661 sharshy metrden 823 sharshy metrge deıin ulǵaıtyldy. Jańa vokzal táýligine orta eseppen 310 jolaýshyǵa qyzmet kórsetýge eseptelgen.
Áýe tasymaly
Qazaqstanda ushý geografııasyn keńeıtý sheńberinde Almaty – Chýntsın jańa baǵyty boıynsha turaqty reıster iske qosyldy. Reıster «Airbus 320neo» áýe kemelerimen sársenbi jáne senbi kúnderi aptasyna eki ret jıilikpen oryndalady.
Sport ınfraqurylymy
Shyǵys Qazaqstan oblysy Marqakól aýdanynyń Qaljyr aýylynda aýdany 850 sharshy metrden asatyn jańa sport modýli ashyldy. Nysan jattyqtyrýshy-oqytýshylardyń jetekshiligimen balalardyń dene shynyqtyrýmen turaqty aınalysýyna arnalǵan.
Qaýipsizdik
Aqtóbe oblysy Muǵaljar aýdany Aqkemer aýylynda órt sóndirý beketi ashyldy. Jańa nysan táýlik boıy kezekshilikke arnalǵan tehnıkamen, baılanys quraldarymen jáne kıim-keshekpen jabdyqtalǵan. Beket úsh eldi meken turǵyndary qaýipsizdigin qamtamasyz etedi jáne TJ-ǵa jedel den qoıýǵa múmkindik beredi.
Osyǵan deıin elde vagon jasaý salasynda ónerkásiptik klaster qurylatyny týraly jazdyq.
