Óńirlerde velosıped ınfraqurylymyn damytý máselesi sheshilmeı otyr — ІІM
ASTANA. KAZINFORM — Elimiz boıynsha 2 myń shaqyrymnan astam velojol qajet. Bul týraly búgin Úkimet otyrysynda Іshki ister mınıstri Erjan Sádenov aıtty.
— Mektepter mańyndaǵy jol ınfraqurylymyn retke keltirý jumystary júrgizildi. Óz kezeginde polıtsııa qyzmetkerleri mektepterde jol erejesi boıynsha sabaqtar, aqparattyq-túsindirý jumystaryn ótkizip, jas jol ınspektorlary otrıadtaryn belsendi damytyp jatyr.
Bıyl tamyz aıynda Qostanaıda TMD elderiniń mektep oqýshylary arasynda halyqaralyq slet ótti. Balalardyń qatysýymen bolǵan jol apattary — 6,5, qaza tapqan balalar sany — 20, jaraqat alǵandar 9 paıyzǵa azaıdy. Bul máselede Іshki ister mınıstrliginiń ustanymy — joldarda balalar jaraqatyn «nóldik kórsetkishke» jetkizý. Sondyqtan jumysty belsendi túrde jalǵastyramyz, — dedi mınıstr.
Sonymen qatar ol samokat máselesi zańmen rettelgenine toqtaldy.
— Trotýarmen júrýge tyıym salyndy. Endi olar jolmen nemese velojolmen júrýi kerek, — dedi ol.
Mınıstrdiń aıtýynsha, velosıped ınfraqurylymyn damytý máselesi óńirlerde tıisti deńgeıde sheshilmeı otyr.
— El boıynsha eń keminde 2 myń shaqyrymnan astam velojol qajet. Búginde, is júzinde bar-joǵy 937 shaqyrym ǵana. Bul problema ásirese megapolısterde ózekti. Mysaly, Almaty qalasynda 12 myńnan astam samokat bar. Al velosıpedke arnalǵan joldar — nebári 89 shaqyrym ǵana. Jergilikti atqarýshy organdar bul máseleni shuǵyl túrde qolǵa alýy tıis, — dedi Erjan Sádenov.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
