Óńirlerde Ýrbanıstıka ortalyqtaryn qurý máselesi kóterildi
ASTANA. KAZINFORM — Astanada ýrbanıstıkany damytý jáne óńirlerde Ýrbanıstıka ortalyqtaryn qurý máselelerine arnalǵan respýblıkalyq semınar-keńes ótti. Bul týraly Ónerkásip jáne qurylys mınıstrligi málim etti.
Semınar-keńes jumysyna Qazaqstan Respýblıkasy Ónerkásip jáne qurylys vıtse-mınıstri Qýandyq Qajkenov qatysty.
— Ýrbanıstıkany damytý, qalalyq ortanyń sapasyn arttyrý jáne eldi mekenderdi abattandyrý Memleket basshysynyń tapsyrmasymen júzege asyrylyp jatqan «Taza Qazaqstan» ekologııalyq baǵdarlamasynyń mańyzdy baǵyty, — dedi Qýandyq Qajkenov.
Forým barysynda Qazaqstan Respýblıkasynyń Qurylys kodeksinde kózdelgen jańa tásilder, óńirlik dızaın-kodtardy damytý, eldi mekenderdiń sáýlettik kelbetin qalyptastyrý, sondaı-aq aýmaqtardy abattandyrý men keshendi damytýǵa arnalǵan zamanaýı tetikter talqylandy.
Qatysýshylarǵa elordanyń ýrbanıstıka salasyndaǵy tájirıbesi, qoǵamdyq keńistikterdi damytý baǵytynda júzege asyrylǵan jobalar jáne qalalyq ortany odan ári jetildirýdiń perspektıvalyq baǵyttary tanystyryldy.
Baıandamalarmen Qazaqstan Respýblıkasy Ónerkásip jáne qurylys mınıstrliginiń, Astana qalasy ákimdiginiń, «QazOrtalyqTKSh» AQ-nyń, «Memlekettik qala qurylysy kadastry» RMK-nyń, Astana qalasynyń Ýrbanıstıka ortalyǵynyń ókilderi, sondaı-aq halyqaralyq sarapshylar sóz sóıledi.
Kezdesý qorytyndysy boıynsha qatysýshylar ózara tájirıbe almasyp, elimizdiń óńirlerinde ýrbanıstıkany damytý baǵytyndaǵy aldaǵy yntymaqtastyq máselelerin talqylady.
Shekten tys ýrbanızatsııany baıaýlatýdyń joldary qandaı ekenin myna siltemeden oqyńyz.
Aıta keteıik, elordada jańa ýrbanıstıkalyq jobalar júzege asady.
