Óńirlerde týrıstik áleýetti damytý: strategııalyq joldardyń biryńǵaı tizbesi jasalady

- Kólik ınfraqurylymy - negizgi týrıstik aımaqtarǵa jetýdi qamtamasyz ete otyryp, avtotýrızm men ishki týrızmdi damytýdyń negizgi faktorlarynyń biri. Búginde avtomobıl joldaryn salý, rekonstrýktsııalaý jáne jóndeý boıynsha keshendi is-sharalar iske asyrylyp keledi. Atap aıtqanda, Alakólge, Katonqaraǵaıǵa, Zerendige, Kendirlige jáne basqa da týrıstik áleýeti joǵary aýmaqtarǵa aparatyn baǵyttarda tıisti jumystar júrgizilip jatyr. Qurylys jáne rekonstrýktsııalaý aıasynda «Rahman qaınary», «Beıneý – Sekseýil», Saryaǵash qalasyn aınalyp ótý, «Ortalyq – Batys» jáne «Qyzylorda – Qaraǵandy» avtomobıl joldarynda jobalar iske asyrylyp jatyr. Budan basqa, jóndeý jumystarymen shamamen 5 myń km avtomobıl joly, onyń ishinde Jańaózen – Kendirli, Kókshetaý – Zerendi, Saryózek – Kóktal, Kegen – Qyrǵyz Respýblıkasynyń shekarasy jáne Qalqaman – Baıanaýyl týrıstik baǵyttaryna kólik qoljetimdiligin qamtamasyz etetin ýchaskeler qamtylǵan, - dedi O. Bektenov Quryltaı depýtatynyń saýalyna jaýap bere otyryp.

Úkimet basshysy jol boıyndaǵy ınfraqurylymdy damytýǵa qatysty toqtala kele, halyqaralyq jáne respýblıkalyq mańyzy bar avtomobıl joldarynyń boıynda 1421 servıs obektisi jumys istep turǵanyn aıtty.

Óńirlerde júrgizilgen jumystar jol ınfraqurylymyn damytýdyń týrızm salasyna oń áserinin tıgizgenin kórsetedi. Máselen, Jetisý oblysynda «Taldyqorǵan – Úsharal» jáne «Úsharal – Dostyq» avtomobıl joldaryn rekonstrýktsııalaý Alakól aýdanynyń týrıstik aımaqtaryna kólikpen jetý múmkindigin jaqsartty. Al «Almaty – Óskemen – Lepsi – Aqtoǵaı» avtomobıl jolynyń keıbir ýchaskeleriniń jańǵyrtylýy Balqash kóliniń týrıstik aımaǵynyń damýyna oń yqpalyn tıgizýde. «Saryózek – Kóktal» avtomobıl joly «Altyn Emel» memlekettik ulttyq tabıǵı parkiniń týrıstik marshrýttaryna barýǵa múmkindik beredi.

- Almaty oblysynda «Alataý amanaty» jobasy aıasynda uzyndyǵy shamamen 1500 km bolatyn týrıstik marshrýt damytylýda. Sonymen qatar óńirdiń týrıstik obektilerine aparatyn avtomobıl joldaryn rekonstrýktsııalaý jáne jóndeý jobalary iske asyrylýda. Joǵaryda baıandalǵandy eskere otyryp, Úkimet óńirlerdiń týrıstik áleýetin damytý úshin strategııalyq mańyzy bar basym avtomobıl joldarynyń biryńǵaı tizbesin jasaǵan jón dep sanaıdy. Atalǵan tizbeni Kólik mınıstrligi múddeli memlekettik organdarmen birge baǵyttarǵa týrıstik suranystyń bar-joǵyn, olardyń óńiraralyq týrıstik marshrýttar men avtotýrızmdi damytýdaǵy mańyzyn, negizgi týrıstik obektilerge kólikpen barý múmkindiginiń bar-joǵyn, sondaı-aq shaǵyn jáne aýyldyq kásipkerlikti damytý áleýetin eskere otyryp, osy jyldyń sońyna deıin qalyptastyrýdy josparlap otyr, - dedi Úkimet basshysy.

Aıta keteıik, jaqynda Quryltaı otyrysynda depýtat Ajar Qajybekova Premer-mınıstrge saýal joldap, týrıstik áleýetti tolyq iske asyrý úshin avtojoldardy týrıstik ınfraqurylymnyń bir bóligi retinde qarastyrýdy usyndy.

Bul rette ol óńirlerdiń týrıstik áleýetin keshendi damytýǵa múmkindik beretin avtojoldardyń biryńǵaı tizilimin ázirlep, ondaǵy baǵyttardy basym nysandar retinde aıqyndaý jáne tıisti jańǵyrtý jumystaryn júrgizý qajet ekenin aıtty.