Óńirlerde sý tasqynynyń aldyn alý jáne halyqty qorǵaý jumystary kúsheıtildi
ASTANA. KAZINFORM – Qazaqstan óńirlerinde eldi mekenderdi yqtımal sý tasqynynan qorǵaý jáne sý basý táýekelderin azaıtý baǵytyndaǵy keshendi is-sharalar jalǵasýda. Bul jumystar aldaǵy kóktemgi tasqyn kezeńinde halyqtyń qaýipsizdigin qamtamasyz etýge jáne ınfraqurylym nysandaryn saqtaýǵa baǵyttalǵan.
Shyǵys Qazaqstan oblysynda Glýbokoe aýdanynyń Tarhanka aýylyndaǵy Úlbi ózeninde sý tasqynyna qarsy jumystar júrgizilip jatyr. Buǵan deıin salynǵan bógen jańǵyrtylyp, ózen deńgeıiniń kóterilýinen týyndaıtyn qaýiptiń aldyn alýǵa baǵyttalǵan sharalar atqarylýda.
Monıtorıng nátıjesinde ózenniń joǵary aǵysynda sý arnalarǵa enip, bógendi aınalyp ótý qaýpi anyqtaldy. Osyǵan baılanysty TJ jónindegi komıssııa arnalardy ýaqytsha jabý týraly sheshim qabyldady. Bul tasqyn sýdyń baǵytyn rettep, sýdyń qaýipsiz ótýin qamtamasyz etýge múmkindik beredi.
Qaraǵandy oblysynda TJ departamenti bastyǵynyń orynbasary D. Dáleshov bastaǵan jumys toby Qarqaraly aýdanyndaǵy sý basý qaýpi joǵary aýmaqtardy aralady. Tekserý barysynda Yntaly, Jarly, Tegisshildik, Kóktas jáne Qarakól aýyldaryndaǵy qorǵanysh bógenderi men sý burý arnalarynyń jaı-kúıi baǵalandy. Nátıjesinde jergilikti atqarýshy organdarǵa anyqtalǵan kemshilikterdi joıý jáne ınjenerlik jumystardy jedeldetý jóninde naqty tapsyrmalar berildi.
Qazirgi ýaqytta oblysta ınjenerlik jumystar josparynyń 64 paıyzy oryndalǵan: 138 is-sharanyń 87-si aıaqtalyp, qalǵany boıynsha jumystar jalǵasýda.
Qostanaı oblysynda da 2026 jylǵy sý tasqynyna daıyndyq jospary júıeli túrde júzege asýda. Óńirde 81 is-sharadan turatyn ınjenerlik jumystar jospary bekitilip, onyń 45-i aıaqtalǵan. Qalǵan 36 baǵyt boıynsha jumys belsendi júrip jatyr. Qostanaı, Amangeldi, Meńdiqara, Qarasý jáne Naýyrzym aýdandarynda qorǵanysh bógenderi nyǵaıtylyp, jalpy uzyndyǵy 6,7 shaqyrym bolatyn aýmaq qorǵaldy.
Sondaı-aq avtomobıl joldaryndaǵy 7 sý ótkizgish qubyr jóndelip, 400-den astam sý ótkizý qurylysy tazartyldy. Nátıjesinde oblystyń 20 eldi mekeni sý tasqynynan qorǵaldy.
Túrkistan oblysynda Báıdibek jáne Maqtaaral aýdandarynda qorǵanysh bógenderin kúsheıtý, kópirlerdi jóndeý jáne sýarý júıelerin jańartý jumystary atqarylyp jatyr. 2025–2026 jyldarǵa arnalǵan sý tasqynynyń aldyn alý jónindegi ınjenerlik jospar aıasynda Shaıan ózenindegi jaǵalaý bógenderin nyǵaıtý aıaqtalýǵa jaqyn. Bul sharalar aldaǵy ýaqytta taýly aımaqtardan keletin erigen jáne jańbyr sýynyń qaýipsiz ótýin qamtamasyz etýge baǵyttalǵan.
Jalpy júrgizilip jatqan ınjenerlik jáne uıymdastyrýshylyq sharalar sý basý qaýpin edáýir tómendetip, yqtımal tasqyndardyń saldaryn azaıtýǵa jáne óńir turǵyndarynyń qaýipsizdigin qamtamasyz etýge múmkindik beredi. Sý tasqynyna daıyndyq jumystary barlyq oblystarda jalǵasýda.
Aıta keteıik, Qazaqstan men Ońtústik Koreıa sý tasqyny men qýańshylyqty boljaýǵa qatysty kelisim jasady.