Óńirlerde sý tasqynynyń aldyn alý sharalary qalaı júzege asyrylyp jatyr
ASTANA. KAZINFORM — Elimizdiń birqatar óńirinde sý basý qaýpin azaıtý jáne halyqtyń qaýipsizdigin qamtamasyz etý maqsatynda sý tasqynyna qarsy is-sharalar jalǵasyp jatyr. Bul týraly TJM baspasóz qyzmeti habarlady.
Shyǵys Qazaqstan oblysynda tasqyn jáne erigen qar sýy basý qaýpi bar eldi mekenderdiń tizbesine 71 eldi meken engizilgen. 2025 jyly óńirde 28 ınjenerlik is-shara júzege asyryldy. Atap aıtqanda, 900 metr qorǵanysh bógetteri jóndeldi, jalpy uzyndyǵy 13 072 metr sý burý arnalary tazartylyp, tereńdetildi, sondaı-aq kópirler men avtomobıl joldaryn salý jáne jóndeý jumystary júrgizilip, bir gıdrotehnıkalyq nysan jóndeýden ótti. Oblysta «Sıtýatsııalyq ortalyq» aqparattyq júıesi bazasynda sý tasqyny jaǵdaıyn baqylaýdyń biryńǵaı kesheni engizildi. Ol GAJ-modýldi, boljam jasaý quraldaryn jáne kiriktirilgen jasandy ıntellekt modelin qamtıdy. Júıe 49 gıdrobeket boıynsha 7 táýlikke arnalǵan boljam qalyptastyryp, táýekelderdi aldyn ala anyqtaýǵa jáne ýaqtyly aldyn alý sharalaryn qabyldaýǵa múmkindik beredi.
Batys Qazaqstan oblysynyń Tasqala aýdanynda arnaıy tehnıkanyń kómegimen arnalardy tazalaý jáne nyǵaıtý jumystary júrgizilip, ózenniń aınalma ýchaskeleri tereńdetilip, keńeıtildi. Sonymen qatar uzyndyǵy 200 metr, bıiktigi 2,5 metr bolatyn qorǵanysh bógeti salyndy.
Al Qyzylorda oblysynda sý tasqynynyń aldyn alý jónindegi ınjenerlik is-sharalar aıasynda qorǵanysh bógetteri nyǵaıtylyp, Aqlaq gıdrotorabyna aǵymdaǵy jóndeý jumystary júrgizildi. Sonymen qatar ınjenerlik josparǵa sáıkes 8 nysanda jalpy uzyndyǵy 49,4 shaqyrymdy quraıtyn qorǵanysh bógetterin nyǵaıtý jumystary atqaryldy.
Soltústik Qazaqstan oblysy Qyzyljar aýdanynda Qarabek kólinen Beskól aýylynyń eski arnasy baǵytyna qaraı 880 metr sý qubyryn kóldeneń baǵytta burǵylaý ádisimen tartý jumystary aıaqtalýǵa jaqyn. Sýdy aıdaýǵa arnalǵan elektr sorǵysy ornatylǵan jeke ǵımarat salyndy.
— Barlyq atqarylyp jatqan is-sharalar sý tasqyny qaýpin azaıtýǵa, halyq pen ınfraqurylymdy qorǵaýǵa, sondaı-aq tótenshe jaǵdaılardyń aldyn alýǵa jáne ýákiletti organdar men qyzmetterdiń daıyndyq deńgeıin qamtamasyz etýge baǵyttalǵan, — delingen aqparatta.
Eske salaıyq, buǵan deıin sý tasqyny kezeńine daıyndyq boıynsha elimizde 69 gıdrotehnıkalyq nysan jóndelip jatqany týraly jazdyq.
