Oralda iri kompanııanyń kókónis baǵasyn asyryp satqany anyqtaldy
ORAL. KAZINFORM — Oral qalasynda kóterme saýdamen aınalysatyn iri kompanııanyń «Saýda qyzmetin retteý týraly» QR Zańynyń 9-baby talaptaryn buzǵany belgili boldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, atalǵan zań talabyna sáıkes áleýmettik mańyzy bar azyq-túlik taýarlaryn satý kezinde saýda ústemesi satyp alý baǵasynan 15 paıyzdan aspaýy tıis.
- Atalmysh kompanııa bıylǵy birinshi toqsanda kartopty 30 paıyzdan 56,7 paıyzǵa deıin, pııazdy 70, sábizdi 50-den 100 paıyzǵa deıin, qyryqqabatty 76,9-dan 84,6 paıyzǵa deıingi saýda ústemelerimen satqan. Kásipkerdiń bul áreketteri zańnama talaptaryn óreskel buzý bolyp esepteledi, - dedi E.Qımatova.
Onyń aıtýynsha, saýda jáne tutynýshylardyń quqyqtaryn qorǵaý departamenti kásipkerlik sýbektisine qatysty ákimshilik is qozǵap, QR Ákimshilik quqyq buzýshylyq týraly kodeksiniń 204-4-baby boıynsha aıyppul saldy.
Áleýmettik mańyzy bar azyq-túlik taýarlarynyń baǵasyn turaqtandyrý maqsatyndaǵy mundaı jumystar jalǵasyn tabady. Osy oraıda memlekettik organdardyń ózara is-qımyly baǵa belgileýdegi zańbýzýshylyqtar boıynsha jedel áreket etip, deldaldyq býyndardy alyp tastaýǵa múmkindik beredi.
Eske sala keteıik, budan buryn BQO-da ónim baǵasyn asyryp satqan kásipkerge aıyppul salynǵanyn jazǵan bolatynbyz.
