Óńirlerde shaǵyn ındýstrııalyq aımaqtar qurylady

ASTANA. KAZINFORM – «Óńirlerde shaǵyn ındýstrııalyq aımaqtar qurylady. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

— «Aýyl amanaty» jobasy aıasynda shaǵyn kredıt berý basym tártippen «Aýyl — El besigi» jáne basqa da baǵdarlamalardyń quraldaryn paıdalana otyryp, ınjenerlik jáne áleýmettik ınfraqurylymdy damytýmen sınhrondy túrde júrgiziledi. Jobalardy sınhrondy iske asyrýdy tıimdi qamtamasyz etý jáne mamandandyrýdy aıqyndaý maqsatynda «AMANAT» partııasymen birlese aýyldyq eldi mekenderge skrınıng jasalyp, basym baǵyttar men ınfraqurylymdyq qajettilikter aıqyndaldy, — dedi Oljas Bektenov jaýabynda.

Budan bólek, Úkimet basshysy óndirilgen ónimderdi saqtaý jáne qaıta óńdeý ınfraqurylymyn damytý, shyǵyndardy azaıtý esebinen sharýalardyń tabysyn arttyrý, logıstıkalyq júıeni jetildirý jáne kásipkerlikti damytý maqsatynda shaǵyn ındýstrııalyq aımaqtar qurylatynyn atap ótedi.

— Sonymen qatar aýyldyq eldi mekender men shaǵyn qalalarda mıkrokredıt berý jáne lızıng qaǵıdalary ózektendirilýde. Jalpy jobany sapaly júzege asyrý máselesi Úkimettiń jáne Ulttyq ekonomıka mınıstrliginiń turaqty baqylaýynda. Qosymsha qarajat bólý máselesi qajettiligine qaraı bıýdjet múmkindigin eskere otyryp qarastyrylady, — dedi Premer-Mınıstr.

Aıta keteıik, Ulttyq ekonomıka mınıstrligi «Aýyl amanaty» baǵdarlamasyn iske asyrýdyń jańa modelin ázirlep jatyr. Baǵdarlama aýyldaǵy kásipkerlikti damytýdy kózdeıdi. Qoldaý tetiginiń ishinde 2,5%-ben shaǵyn nesıe men lızıng bar. Qazir mınıstrlik skrınıng arqyly eldi mekenderdiń mamandanýyn anyqtaý tásilin, erejelerdi jańartpaq.