Óńirlerde qoljetimdi baspanamen qamtý baǵdarlamacyn jandandyrý kerek – Premer-Mınıstr

ASTANA. KAZINFORM – Premer-Mınıstr Oljas Bektenov azamattardy qoljetimdi baspanamen qamtý boıynsha óńirlik baǵdarlamalardy jandandyrýdy tapsyrdy.

Memleket basshysy Qasym-Jomart Toqaev Úkimettiń keńeıtilgen otyrysynda azamattardyń turmys sapasyn jaqsartýǵa yqpal etetin, eń bastysy, elge paıdasy tıetin naqty nátıjege qol jetkizý basty maqsat bolýǵa tıis ekenin aıtqan edi.

Ótken jyly qurylys salasynda 16% deńgeıinde ósim saqtaldy. 20 mıllıon sharshy metr turǵyn úı paıdalanýǵa berildi. 185 myń otbasy baspana jaǵdaıyn jaqsartty.

– Qabyldanǵan sharalar azamattarǵa memlekettik qoldaý quraldaryn alýdy ońaılatýǵa múmkindik berdi. Turǵyn úı saıasatynda negizgi ról atqaratyn Otbasy banki ulttyq damý ınstıtýty mártebesine ıe boldy. Tizimderdi tsıfrlyq formatqa kóshirý adam faktoryn barynsha azaıtyp, turǵyn úıdi esepke alý men bólý rásimderiniń ashyqtyǵyn arttyrdy, – dedi O.Bektenov Úkimettiń búgingi otyrysynda.

Jalǵa beriletin turǵyn úı tetikteri men memlekettik ıpotekalyq baǵdarlamalar da mańyzdy ról atqaryp keledi. «Naýryz» jáne «Naýryz – jumysker» baǵdarlamalary boıynsha 233 mlrd teńgege 8,5 myńnan astam nesıe berilgen.

– Bıyl da qurylys qarqynyn saqtap, turǵyn úıdi qoljetimdi etý baǵytynda jumysty jalǵastyrý kerek. Ónerkásip jáne qurylys mınıstrligine óńir ákimdikterimen birlesip, turǵyn úıdi paıdalanýǵa berý josparlarynyń oryndalýyn qamtamasyz etýdi tapsyramyn. Bul rette qalalarda qolaıly, jaıly ortany qalyptastyrýǵa kóńil bólý kerek. Mektepter men balabaqshalar, aýrýhanalar jaqyn ári qoljetimdi bolýǵa tıis. Tıisti ınjenerlik-kommýnıkatsııalyq ınfraqurylymdy damytý jumystary da ozyq qarqynmen júrýi kerek, – dedi Úkimet basshysy.

Sonymen birge, Premer iri qalalarda, ásirese Astana men Almatyda qurylys jumystary artqanyn, monoqalalar men aýyldyq jerlerdegi turǵyn úı qurylysyn damytýǵa da kóńil bólý kerektigin aıtty.

– Mınıstrlikke jáne «Báıterek» holdıngine ákimdiktermen birlesip, azamattardy qoljetimdi baspanamen qamtamasyz etý boıynsha óńirlik baǵdarlamalardy iske asyrýdy jandandyrýdy tapsyramyn, – dedi Oljas Bektenov.

Aıta keteıik, bıyl Otbasy bank 70 myń salymshyǵa 1,6 trln teńge jeńildetilgen ıpotekalyq qaryz beredi.

Sondaı-aq, úleskerlerdiń quqyǵyn qorǵaýǵa jáne naryqtyq úlestik qurylysty damytý úshin zańnamalyq ózgerister qabyldanǵan.