Óńirlerde kógildir otynǵa qoljetimdilik artyp keledi
ASTANA.KAZINFORM - 2025 jyly «QazaqGaz Aimaq» AQ Astana men onyń aglomeratsııasyn gazdandyrýǵa erekshe den qoıdy. Sonymen qatar óńirlerdi kógildir otynmen qamtý kúsheıdi. Oǵan dálel, bıyl 95 eldimekende 350 myń adam gazǵa qol jetkizse, 2026 jyly taǵy 41 eldimekenge gaz beriletin bolady. Máselen, eger 2024 jyldyń 1 qańtarynda el turǵyndarynyń 62%-y gazben qamtamasyz etilse, 2025 jyldyń qorytyndysy boıynsha bul kórsetkish 64,2%-ǵa deıin ósti. Bul rette, ishki naryqta gaz tutyný kólemi únemi ósip keledi: jyl qorytyndysy boıynsha tıisti meje 20,4 mlrd m³ qurady. Іri jobalardy júzege asyrý jáne jańa magıstraldyq gaz qubyrlaryn qosý arqasynda júzdegen eldimekende ómir súrýge qajet qolaıly jaǵdaı jasalyp, qarqyndy damýǵa múmkindik týdy.
Memleket basshysynyń tapsyrmasy boıynsha «Saryarqa» gaz qubyrynyń 1-shi kezeńin iske asyrý aıasynda Astananyń aınalasynda ornalasqan eldimekenderdi gazdandyrý jumysy júrgizilip jatyr. «QazaqGaz Aimaq» kompanııasy mamandarynyń belsendi atsalysýymen Nurly, Talapker, Qoıandy, Y.Altynsarın, Aqqaıyń eldimekenderindegi 35 myń adam gaz ıgiligin kóre bastady.
Qazaqstan Respýblıkasy Prezıdenti Qasym-Jomart Toqaev qatysqan telekópir barysynda Qosshy qalasy gazǵa qosyldy. Sóıtip qaladaǵy 31 myń turǵyn «kógildir otynǵa» qosylý múmkindigine ıe boldy.
Tsıfrlandyrýdaǵy serpilis
QazaqGaz kúndelikti jumysynda jasandy ıntellektini (JI) engizýdi berik ustanyp otyr. Kompanııanyń basty tutynýshylyq ónimi – QazaqGaz Aimaq mobıldi qosymshasy, abonentterge esepke alý quraldarynyń kórsetkishterin fotosýretter arqyly berýge múmkindik týǵyzdy. Jasandy ıntellektke negizdelgen algorıtmder eseptegish kórsetkishterin avtomatty túrde tanıdy jáne derekterdi abonenttińqatysýynsyz óńdeıdi. Qazirdiń ózinde 330 myńnan astam adam osy servısti paıdalansa, 2026 jyldyń sońyna deıin barlyq abonenttiń keminde 10%-yn qosymshaǵa qosý josparlanyp otyr.
Egov portalynda qoldanysqa berilgen gazdandyrý jónindegi JI-keńesshi jyldam ári táýlik boıy jaýap bere otyryp, baılanys ortalyqtarynyń jumysyn jeńildetip otyr. Sondaı-aq, tehnıkalyq sharttardy berý protsesi tolyǵymen onlaın sıpatqa kóshti. Qajetti qujattar derekqordan avtomatty túrde júkteledi jáne olardy tirkeý jyldamdyǵy 12 esege ósti.
Qysqasy, ıgilikti isterdiń nátıjesi sol, qazaqstandyqtardyń gaz ıgiligine qol jetkizýi joǵarylap, eldiń energetıkalyq qaýipsizdigi nyǵaıyp keledi.