Óńirlerde qandaı nysandar iske qosyldy
ASTANA. KAZINFORM – Ótken aptada iske qosylǵan jobalar qandaı?
Memleket basshysy Qasym-Jomart Toqaevtyń tapsyrmalaryn júzege asyrý aıasynda óńirlerinde ekonomıkany ártaraptandyrý, óńdeýshi ónerkásipti damytý jáne ımportty almastyrý baǵytynda júıeli jumystar atqarylyp keledi. Atap aıtqanda, jańa óndiris oryndary, logıstıkalyq jáne áleýmettik nysandar paıdalanýǵa berildi.
Metall konstrýktsııasy men beton zaýyty (Almaty oblysy):
Qarasaı aýdanynda quny 4,7 mlrd teńge bolatyn keshen ashyldy. Jyldyq qýaty – 10 myń tonna metall konstrýktsııasy men 300 myń m3 beton. Sonymen qatar sendvıch-panelder men modýldik ǵımarattar óndiriledi. 80 jańa jumys orny ashyldy. Ónim ishki naryqta satylady jáne Qyrǵyzstan men Ózbekstanǵa eksporttalady.
Logıstıkalyq keshen (Almaty oblysy):
Qarasaı aýdanyndaǵy 50 gektar aýmaqta «A» sanatyndaǵy qoıma kesheniniń birinshi kezeńi iske qosyldy. Birinshi kezeńge salynǵan ınvestıtsııa kólemi – 20 mlrd teńge, (jobanyń jalpy quny – 70 mlrd teńge). Keshen 3PL logıstıkalyq qyzmetterin kórsetedi, al qoımalardyń jalpy aýdany 160 myń m2-ge jetedi. Joba aıasynda 1,2 myń jumys orny ashylady, qazirgi ýaqytta 135 adam jumyspen qamtylǵan.
Túıe sútinen qurǵaq untaq shyǵaratyn zaýyt (Qyzylorda oblysy):
Aral qalasynda quny 3 mlrd teńge bolatyn keshen iske qosyldy (onyń 1,8 mlrd teńgesi «Ónerkásipti damytý qory» arqyly jeńildetilgen qarjylandyrý). Jylyna shamamen 400 tonna ónim óndiriletin bul zaýytta 23 adam turaqty jumyspen qamtylady. Kásiporyn jergilikti mal ósirýshilerden táýligine 20 myń lıtrge deıin shıkizat óńdeıdi.
Joǵary surypty as tuzyn óndirý zaýyty (Qyzylorda zaýyty):
Aral qalasynda quny 1,8 mlrd teńge bolatyn joǵary surypty as tuzyn óndiretin kásiporyn ashyldy. Jyldyq óndiristik qýaty 40 myń tonna. 20 turaqty jumys orny ashyldy. Ónim ishki naryqty qamtamasyz etip, kórshiles elderge eksporttalady.
Lamınat óndiretin zaýyt (Túrkistan oblysy):
«Turan» AEA-da quny 5 mlrd teńge bolatyn óndiris iske qosyldy. Birinshi kezeńde ishki naryq úshin jylyna 840 myń m2 lamınat óndiriledi jáne 65 jumys orny ashyldy. Ekinshi kezeń iske qosylǵannan keıin óndiristik qýat jylyna 2,4 mln m2-ge deıin artyp, jumys oryndarynyń sany 150-ge jetedi.
Dene shynyqtyrý-saýyqtyrý kesheni (Aqtóbe oblysy):
Alǵa aýdanynda jalpy aýmaǵy 3 myń m2 bolatyn júzý basseıni men fýtbol alańy bar dene shynyqtyrý-saýyqtyrý kesheni paıdalanýǵa berildi. Nysan táýligine 150 adamǵa deıin qabyldaı alady jáne aýyl jastarynyń buqaralyq sportpen aınalysýyna múmkindik beredi.
Atyraý – Batýmı áýe baǵyty:
Qazaqstan men Grýzııa arasynda turaqty tikeleı áýe reısi iske qosyldy. Reıster aptasyna bir ret – seısenbi kúnderi Airbus A320 áýe kemelerimen oryndalady. Jańa baǵyt halyqaralyq áýe qatynasyn keńeıtip, óńirlerdiń týrıstik áleýetin damytýǵa yqpal etedi.
