Óńirlerde esirtkige qarsy jańa jobalar júzege asyp jatyr — Berik Asylov

ASTANA. KAZINFORM – Memleket basshysy nashaqorlyqtyń aldyn alýdy, ásirese bilim berý jáne aqparattyq salalarda kúsheıtýdi, sondaı-aq jastar arasynda esirtki men alkogoldi nasıhattaýǵa, onyń ishinde ınternet pen BAQ-ta jaǵymdy etip kórsetýine qarsy turýdy tapsyrdy. 

Bas prokýror Berik Asylovtyń dereginshe, búgingi tańda quqyq buzýdyń aldyn alýǵa jastar men oqý oryndaryn tartyp, elimizdiń jetekshi joǵary oqý oryndarymen yntymaqtastyq týraly 40 memorandým jasalǵan.

— Bilim berý uıymdarynda, buqaralyq aqparat quraldarynda jáne áleýmettik jelilerde esirtkige qarsy keń aýqymdy naýqan júrgizilip jatyr. Mysaly, Abaı oblysynda JOO-nyń zań fakýltetiniń stýdentteri (56 adam) nashaqorlyqtyń jáne basqa da qylmystardyń aldyn alý maqsatynda Semeı qalasynyń 7-10 synyp oqýshylarymen kezdesý ótkizýdi kózdeıtin jobany bastady, — dedi ol.

Almatydaǵy mundaı ózara is-qımyl «Jastarmen» atty jastar jobasyna 3,5 myńnan astam qatysýshyny tartýǵa múmkindik berdi, onda stýdentter polıtsııamen birge oıyn-saýyq oryndarynda reıdter júrgizedi, saıabaqtar men qoǵamdyq oryndardy aralap, sholyp shyǵady.

— Shyǵys Qazaqstan oblysynda prokýrorlar ákimdiktiń qoldaýymen bıznes ókilderimen birlesip «STOP esirtki!» bastamasyn bastady, jeke qor qurdy. Esirtkige qatysty quqyq buzý týraly habarlaǵan adamdarǵa syıaqy tólenedi. Jobalar ár óńirde júzege asyrylyp jatyr, — dep jazdy áleýmettik jelide Berik Asylov. 

Aıta ketelik Shyǵys Qazaqstan oblysynda esirtki zerthanasy joıylǵan edi.