Óńirlerde dándi daqyldardyń 75%-y jınaldy
ASTANA. KAZINFORM – Vıtse-premer Serik Jumanǵarınniń tóraǵalyǵymen ótken egin jınaý naýqany boıynsha jedel shtabta jıyn-terimdi úzdiksiz júrgizý úshin fermerlerdi barlyq qajetti quraldarmen qamtamasyz etý máselesi qaraldy. Bul týraly Úkimettiń baspasóz qyzmeti habarlady.
Aýa raıynyń qolaıly bolýynyń arqasynda 27 qyrkúıektegi jaǵdaı boıynsha negizgi astyq egetin óńirlerde Qazaqstanda 13 mln ga jýyq alqap nemese 75%-y jınaldy. Egin jınaý naýqanyn qazan aıynyń sońyna deıin aıaqtaý josparlanǵan. Alda maıly daqyldar jınalady.
Ónimdi keptirý agregattary úshin arzandatylǵan dızel otyny men suıytylǵan gazdy tıep, jóneltý jáne 4-synypty arpa men bıdaıdyń baǵasy – jedel shtab otyrysynda qaralǵan negizgi máseleler boldy.
Aýyl sharýashylyǵy vıtse-mınıstri Azat Sultanov habarlaǵandaı, 27 qyrkúıekte elevatorlarǵa 3,376 mln tonna astyq tústi, onyń 2,476 mln tonnasy – bıdaı. Bıdaıdyń jalpy kóleminde 1,4 mln tonnasy 3-synypty bıdaı (56,2%), 701,4 myń tonna – 4-synypty (28,3%), 263,1 myń tonna – 5-synypty (10,6%) astyq. Qambaǵa túsken arpanyń 95%-ǵa jýyǵy – 2-synypty arpa.
4-5 synypty bıdaı jınaýdy ulǵaıtý perspektıvasyn eskere otyryp, sharýalar osy astyqtyń forvardtyq satyp alý baǵasyn múmkindiginshe erte jarııalaýdy surap otyr. Serik Jumanǵarın Azyq-túlik korporatsııasyna kelesi aptada forvardtyq satyp alý baǵasyn jarııalaýdy tapsyrdy.
Negizgi astyq egetin óńirlerge astyq keptirý agregattarynyń jumysy úshin arzan baǵada suıytylǵan gaz jetkizý bastaldy. Ónimdi jınap, keptirýge qajetti dızel otynyn tıep jóneltý josparǵa sáıkes júrgizilip jatyr.
Kúzde topyraqqa engizý úshin qajetti mıneraldy tyńaıtqyshtardy jóneltý barysy jeke qarastyryldy. Jalpy jospardyń 84%-ynda jóneltý tómen qarqynmen júrip jatqan óńirler bar. Vıtse-premer sharýalar tyńaıtqyshtardy ýaqytynda qoldaný úshin jumys úderisin jedeldetýdi tapsyrdy.
