Óńirlerde balalar qaýipsizdigin qamtamasyz etý sharalary kúsheıtildi
ASTANA. KAZINFORM – Bas Prokýror jyl qorytyndysy boıynsha ótken alqa otyrysynda balalardy qylmystyq qol suǵýshylyqtan qorǵaý jáne olardyń ómiri úshin qaýipsiz, senimdi orta qalyptastyrý barlyq deńgeıdegi memlekettik organdardyń jumysynyń sózsiz basymdyǵy bolýy tıis ekenin aıtty.
Bas Prokýror Berik Asylov balalardyń quqyǵyn qorǵaýdy qamtamasyz etý máseleleri qaralyp, oblys prokýrorlarynyń istegen jumystary boıynsha baıandamalar tyńdalǵanyn aıtty.
— Batys Qazaqstan oblysynyń prokýratýrasy qylmystyq táýekelderdi anyqtaýǵa jáne azaıtýǵa baǵyttalǵan «Qaýipsiz óńir» jobasyn usyndy. Joba qaýipti ýchaskelerdi abattandyrýdy, kóshelerdi jaryqtandyrýdy, ınfraqurylymdy monıtorıngteýdi, sondaı-aq quqyq buzý týraly derekterdi taldaý negizinde profılaktıkalyq jáne patrýldik jumysty kúsheıtýdi kózdeıdi, — dedi Berik Asylov.
Qazirgi tańda ájepteýir nátıjeler bar: birqatar qaýip tómendetildi, balalardyń mektepke baratyn jolynda ınfraqurylym qamtamasyz etildi, býllıng faktileri anyqtalyp, jedel sharalar qabyldandy.
— Atalǵan jumys Memleket basshysy Qasym-Jomart Toqaevtyń ul-qyzdarymyzdyń parasatty jáne jan-jaqty bolyp ósýine jaǵdaı jasaý, jas azamattardyń quqyǵyn qorǵap, densaýlyǵyn saqtaý árdaıym memlekettiń basty basymdyǵy bolyp sanalady degen talaptaryna sáıkes keledi. Balalar — bizdiń bolashaǵymyz. Sondyqtan elimizdegi árbir jetkinshektiń meıirim men qamqorlyqqa bólenip, úlkenniń qoldaýyn sezinýi erteńgi kúnge senimmen qaraýy óte mańyzdy, — dedi ol.
Barlyq óńir prokýrorlaryna balalar qaýipsizdigi máselelerine erekshe nazar aýdara otyryp, osyndaı jumysty júrgizý tapsyryldy.
— Qaýipti ýchaskelerdi anyqtaý, jaryqtandyrý men patrýldeýdi kúsheıtý, jergilikti atqarýshy organdarmen jáne polıtsııamen naqty ózara is-qımyldy qamtamasyz etý prokýrorlardyń aldaǵy kezeńdegi negizgi mindeti.
Balalardy qylmystyq qol suǵýshylyqtan qorǵaý jáne olardyń ómiri úshin qaýipsiz, senimdi orta qalyptastyrý barlyq deńgeıdegi memlekettik organdardyń jumysynyń sózsiz basymdyǵy bolýy tıis, — dedi Bas prokýror.
Almaty oblysynyń prokýratýrasy Kundelik platformasymen memorandým jasap, qosymshanyń basty betinde prokýratýranyń blogyn iske qosty.
— Blog balalardyń quqyqtyq mádenıetin arttyrýǵa jáne olardyń qaýipsizdigin qamtamasyz etýge baǵyttalǵan. Quqyqtyq negizderdi tıimdi qabyldaý úshin ózara is-qımyldyń 4 negizgi tetigi qarastyrylǵan.
Materıaldar (foto, vıdeo, mátindik formattar jáne vebınarlar) oqýshylardyń jas erekshelikterine qaraı jasalyp, kúrdeli quqyqtyq máseleler túsinikti tilde beriledi, usynymdar men keńesterdi qamtıdy jáne oqý protsesinde qoldanylady.
Balalarmen keri baılanys QR-kodtar, sondaı-aq messendjerler arqyly anonımdi ótinish berý múmkindigimen qamtamasyz etilgen, — dedi Berik Asylov.
Blogty 210 myń oqýshy men olardyń ata-analary qarady.
— Kundelik platformasymen yntymaqtastyq quqyqtyq aqparatty jetkizýmen qatar, qolda bar málimetterdi taldaýǵa, olardy «Baqytty jáne qaýipsiz balalyq shaq» jobasy aıasynda paıdalanýǵa, sondaı-aq táýekel tobyndaǵy balalardy jáne balany tárbıeleý boıynsha óz mindetterin oryndamaıtyn ata-analardy ýaqtyly anyqtaýǵa múmkindik berdi.
Atqarylǵan jumystyń nátıjesinde 16 myńnan astam bala tıisti medıtsınalyq qyzmettermen qamtyldy, 4 myńnan astam ata-anaǵa zańda kózdelgen áleýmettik tólemder qamtamasyz etildi.
Qamqorlyqsyz qalǵan úsh jasar balaǵa jedel kómek kórsetildi: ákesi jazasyn ótep jatqan, al anasy qoǵamǵa jat ómir saltyn ustanǵan. Anasy maskúnemdikten májbúrli emdeýge jiberilip, bala Kámeletke tolmaǵandardy beıimdeý ortalyǵynda tıisti kútim men baqylaýǵa alyndy, — dedi Asylov.
Bas prokýror bul atqarylǵan jumystyń bir bóligi ǵana ekenin atap ótti.
Balalardyń quqyqtaryn qorǵaý jónindegi prokýrorlar jumysyn júıeleý, sondaı-aq balalar men ata-analardy aqparattandyrý tıimdiligin arttyrý maqsatynda Kundelik platformasymen osyndaı ıntegratsııany júzege asyrý tapsyryldy.
Bul:
* balalardyń quqyqtaryn qorǵaýǵa baǵyttalǵan prokýratýra jobalaryn biriktirýge jáne júıeleýge;
* naqty balalar men ata-analar toptarymen jumysty biryńǵaı ári úılestirilgen tásilde júrgizýge;
* qolaıly ári keńinen qoldanylatyn tsıfrlyq qural arqyly quqyqtyq tárbıeni jáne zańǵa baǵynatyn azamatty qalyptastyrýdy kúsheıtýge múmkindik beredi.
— Atalǵan jumystardyń barlyǵy balalar úshin qaýipsiz orta qalyptastyrýǵa jáne «Zań men Tártip» qaǵıdattaryn profılaktıka, ýaqtyly kómek kórsetý jáne árbir balanyń quqyǵyn qorǵaý arqyly is júzinde iske asyrýǵa baǵyttalǵan, — dedi ol.
Aıta ketelik jańa oqý jylynyń basynan bastap elimizdiń barlyq balabaqshalarynda, mektepterinde jáne kolledjderinde 1,4 mln-nan astam «Jeke qaýipsizdik» sabaǵy ótkizildi.