Óńirlerde 6 ýnıversıtettik klınıka, 14 aýrýhana, 11 perınataldyq jáne 3 ulttyq ortalyq salynady

ASTANA. KAZINFORM – Elimizdiń óńirlerinde 6 ýnıversıtettik klınıka, 14 aýrýhana, 11 perınataldyq jáne 3 ulttyq ortalyq salynady. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.

«Tujyrymdamany iske asyrýdyń birinshi kezeńi densaýlyq saqtaý nysandary qurylysyn kezeń-kezeńimen júrgizýdi kózdeıdi. Bul rette 11 440 tósek oryndy quraıtyn 34 negizgi joba qarastyrylǵan. Óńirler zamanaýı kóp beıindi aýrýhanalarmen qamtamasyz etiledi. Onyń ishinde 6 ýnıversıtettik klınıka, 14 aýrýhana, 11 perınataldyq jáne 3 ulttyq ortalyq bar. Budan basqa densaýlyq saqtaý nysnadaryn kúrdeli jóndeý jáne jabdyqtaý jumystary jalǵastyrylýda. Ekinshi kezeń 2 500 medıtsınalyq nysanyn qaıta jańǵyrtý, jóndeý jáne jańadan qurylys salý arqyly júzege asyrylady», - dedi ol.

Mınıstrdiń aıtýynsha, tujyrymdamany iske asyrý barysynda balalar tósek-oryndarynyń tapshylyǵyn joıý sharalary pysyqtalady. Atap aıtqanda 200 tósek oryndy Balalar onkologııa jáne gematologııa ortalyǵynyń, 200 tósek-oryndy Balalar hırýrgııasy ortalyǵynyń, Astana qalasyndaǵy Ulttyq shuǵyl medıtsınalyq úılestirý ortalyǵy janynan 200 tósek-oryndyq balalar korpýsynyń qurylysy bastalady.

«Almaty qalasynda Ulttyq ınnovatsııalyq hırýrgııa ortalyǵynyń qurylysy qajet. Atalǵan sharalar halyqqa joǵary mamandandyrylǵan medıtsınalyq kómektiń qoljetimdiligin jáne respýblıkalyq ǵylymı-zertteý ınstıtýttarynyń jáne ulttyq ortalyqtardyń jumysyn kúsheıtedi», - dedi Aqmaral Álnazarova.

Aıta keterligi, tujyrymdamany iske asyrý barysynda myna nátıjelerge qol jetkizý josparlanǵan:

- densaýlyq saqtaý nysandarynyń tozý dárejesin tómendetý (2023 jyly - 49,3%); 
- tıptik emes úlgidegi nysandardyń úlesin 25 paıyzǵa azaıtý (2023 jyly - 52,2%);
- densaýlyq saqtaý nysandarynyń jabdyqtalýyn 88-90 paıyzǵa ulǵaıtý jáne normatıvterge sáıkes bilikti medıtsına qyzmetkerlerimen qamtamasyz etý.