Óńirlerde 200-den astam avtomattandyrylǵan ólsheý júıesi ornatylady

ASTANA. KAZINFORM – Aldaǵy jyldary joldardyń merziminen buryn tozýyn boldyrmaý úshin óńirlerde 200-den astam avtomattandyrylǵan ólsheý júıesi ornatylady. Bul týraly Kólik mınıstrliginiń baspasóz qyzmeti habarlady. 

Bul qurylǵylar qalalarǵa kireberis joldarda, karerlerdiń mańynda jáne qozǵalys qarqyndylyǵy joǵary ýchaskelerde ornatylady. Aýyr júk kólikterin ólsheý avtomatty túrde qozǵalys barysynda júzege asyryla beredi. Bul týraly Marat Qarabaev azamattardy jeke qabyldaý barysynda málim etti.

Marat Qarabaev jolaýshylar tasymalyna arnalǵan vagondar parki jyl saıyn jáne júıeli túrde jańartylyp jatqanyn atap ótti. 

— Bıyl 226 jańa vagon satyp alý josparlanǵan. Osy kezge deıin jyl saıyn shamamen 150-180 vagon satyp alynsa, bıyldan bastap 2029 jylǵa deıin jyl saıyn 200-den astam vagon satyp alynady. Bul 2029 jylǵa deıin jolaýshy vagondary parkin tolyqtaı jańartýǵa múmkindik beredi. Sondaı-aq bıylǵy jyldan bastap Stadler Kazakhstan zaýyty da vagondardy shyǵarýǵa kiristi, — delingen mınıstrlik habarlamasynda. 

Aıta ketelik Qazaqstanda avtokólikti memlekettik nómirimen birge satý múmkindigi beriledi.