Óńirler jergilikti joldardyń sapasyn jaqsartý josparyn ázirleıdi
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev «Sapaly joldar: josparlaýdan paıdalanýǵa deıin» taqyrybyndaǵy respýblıkalyq semınar-keńes aıasynda jergilikti mańyzy bar avtojoldar sapasyn jaqsartý máselelerin qarady.
Kólik mınıstrligi uıymdastyrǵan semınar-keńeske ortalyq memlekettik organdar men óńirler basshylarynyń orynbasarlary, sondaı-aq beıindi kompanııalar men uıymdardyń basshylary qatysty. Jıyn barysynda jol jumystaryn júrgizýdiń jekelegen kezeńderi ǵana emes, jergilikti jol jelisin basqarý júıesin tolyq jetildirý máseleleri de talqylandy.
Jol sapasy máselesi Memleket basshysynyń turaqty nazarynda. Prezıdent Qasym-Jomart Kemeluly Toqaev jol ınfraqurylymyn damytý jumystarynyń naqty nátıjesine basa mán berý qajettigin atap ótken bolatyn. Bul rette jol sapasyna qoıylatyn talaptardy kúsheıtý, saladaǵy jaýapkershilikti arttyrý ózekti mindetterdiń biri bolyp qala beredi.
Premer-mınıstrdiń birinshi orynbasary atqarylatyn jumystardyń sapasyn baqylaýdy kúsheıtý, joldardyń buzylýyna jol bermeý týraly atap ótti. Jergilikti atqarýshy organdar nysandardyń belgilengen talaptarǵa tolyq sáıkes bolǵan jaǵdaıda ǵana qabyldanýyn qamtamasyz etý qajettigin basa aıtty.
— Kepildik merzimi ishinde aqaýlar anyqtalǵan jaǵdaıda, olardy merdigerler óz qarajaty esebinen joıýy tıis, — dedi Nurlybek Nálibaev.
Oblystar men respýblıkalyq mańyzy bar qalalardyń ákimdikteri bir apta ishinde jergilikti joldardyń sapasyn jaqsartý jónindegi úsh jyldyq josparlar ázirleıdi.
Josparlar jol jumystarynyń barlyq kezeńin qamtýy tıis. Atap aıtqanda, basym ýchaskelerdi aıqyndaý, jobalaý qujattamasyn ázirleý, qurylys jáne jóndeý jumystaryn júrgizý, olardyń sapasyn baqylaý, joldardy keıinnen kútip-ustaý máseleleri eskerilý qajettigi atap kórsetildi.
Semınar qorytyndysy boıynsha respýblıkalyq, jergilikti mańyzy bar avtojoldar jelisiniń sapasyn jaqsartýǵa baǵyttalǵan naqty mindetter aıqyndaldy.
Aıta ketelik Bektenov joldardyń jaǵdaıyna qatysty eskertý jasaǵan edi.
