Óńirler vaýcherlik qarjylandyrýdy engizý tájirıbesin ıgerip jatyr
ASTANA. KAZINFORM – Elimizde mektepke deıingi uıymdarda vaýcherlik qarjylandyrýdy engizý jumystary belsendi túrde jalǵasýda. Bul úderistiń mańyzdy kezeńi – óńirler arasyndaǵy tájirıbe almasý. Bul týraly Úkimettiń baspasóz qyzmeti habarlady.
Astanada ótken kezdesýde elordalyq Bilim basqarmasy men Qarjylyq ortalyq ókilderi Abaı jáne Pavlodar oblystarynan kelgen áriptesterimen óz tájirıbelerimen bólisti.
2025 jyldyń basynan bastap Astana tolyqtaı vaýcherlik qarjylandyrý júıesine kóshken. Jańa júıege 600-den astam balabaqsha qatysyp, berilgen vaýcherler sany 18,9 myńǵa jetti. Bul mehanızm mektepke deıingi uıymdar arasynda memlekettik tapsyrysty ashyq ári tıimdi bólýge baǵyttalǵan.
Kezdesý barysynda vaýcherlik qarjylandyrýdyń negizgi baǵyttary, onyń bilim berý júıesine tıgizetin oń áseri jáne ata-analar men mektepke deıingi uıymdar úshin tıimdi tustary talqylandy. Delegatsııa ókilderi jańa júıege kóshýge qatysty týyndaǵan saýaldaryna jaýap aldy.
Jańa júıeniń negizgi artyqshylyqtary:
• balabaqshalar arasynda durys básekelestikti qalyptastyrý arqyly qyzmetter sapasyn arttyrý;
• ata-analardyń bilim berý mekemesin tańdaý erkindigi;
• qarjylandyrý jáne bıýdjet qarajatyn jumsaýdyń ashyqtyǵy.
Vaýcherlik qarjylandyrý Astanadan ózge Taraz, Túrkistan, Oral jáne Shymkent qalalarynda da sátti engizildi. Jańa júıeniń arqasynda Túrkistan, Oral jáne Taraz qalalarynda 2 jastan asqan balalardyń kezegi tolyǵymen qanaǵattandyryldy.
Aldaǵy ýaqytta óńirler arasyndaǵy tájirıbe almasý jalǵasady. Bul elimizdiń barlyq óńirlerine vaýcherlik qarjylandyrýdy tıimdi engizý úderisin jedeldetýge jáne mektepke deıingi bilim berý salasyndaǵy jańa bastamalardy júzege asyrýdyń tıimdiligin arttyrady.
Eske sala keteıik, buǵan deıin Prezıdent Qasym-Jomart Toqaev Úkimettiń keńeıtilgen otyrysynda mektepter salý men jańǵyrtý jumystary jóninde pikir bildirgen edi. Onda Memleket basshysy endi mektepter de vaýcherlik tásilmen qarjylandyrylýy múmkin ekenin aıtty.