Óńirler qazan aıynyń sońyna deıin nashaqorlyqqa qarsy jospar ázirleýi tıis
ASTANA. KAZINFORM – Oljas Bektenov Nashaqorlyqtyń aldyn alý jáne esirtki qylmysyna qarsy is-qımyl jónindegi respýblıkalyq shtab otyrysyn ótkizdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Nashaqorlyqtyń aldyn alý jáne esirtki qylmysyna qarsy is-qımyl boıynsha memlekettik organdardyń qyzmetin úılestirý jónindegi respýblıkalyq shtab otyrysyn ótkizdi.
Іshki ister, densaýlyq saqtaý, oqý-aǵartý, mádenıet jáne aqparat mınıstrleri Memleket basshysynyń bıylǵy tamyz aıynda ótken Qaýipsizdik keńesi otyrysynda bergen nashaqorlyqtyń taralýyna qarsy sharalar qabyldaý jónindegi tapsyrmalaryn júzege asyrý barysy týraly baıandama jasady. Úkimet janyndaǵy Quqyq buzýshylyqtyń aldyn alý jónindegi vedomstvoaralyq komıssııanyń tapsyrmalary aıasynda atqarylyp jatqan sharalarǵa nazar aýdaryldy.
Premer-mınıstr nashaqorlyq pen esirtki qylmysy ulttyq qaýipsizdikke qater tóndiretin jáne júıeli ári vedomstvoaralyq tásildi talap etetin ózekti másele retinde qala beretinin atap ótti.
— Memleket basshysy jarııalaǵan «Zań men tártip» qaǵıdatyn qamtamasyz etý — qoǵamnyń ornyqty damýynyń, quqyqtyq tártipti nyǵaıtýdyń, azamattar quqyqtaryn qorǵaýdyń mańyzdy sharty. Memlekettik organdar nashaqorlyqtyń aldyn alý jáne esirtki qylmysyna qarsy is-qımyl boıynsha aýqymdy jumystar júrgizip jatyr. Birqatar zań qabyldanyp, salalyq ınstıtýttar men ınfraqurylymdar qurylýda, bul saladaǵy halyqaralyq yntymaqtastyq keńeıip keledi. Atalǵan jumys qarqynyn tómendýge bolmaıdy, ol jalpyulttyq sıpatqa ıe bolýy kerek, — dep atap ótti Oljas Bektenov.
Búgingi tańda Qazaqstanda 2026–2028 jyldarǵa arnalǵan nashaqorlyqqa jáne esirtki bıznesine qarsy kúrestiń keshendi jospary ázirlenýde, onda jańa strategııa men tásilder qoldanylady. Jastar arasynda, onyń ishinde NEET sanatyndaǵy oqymaıtyn jáne jumys istemeıtin jastar arasynda, aldyn alýǵa erekshe nazar aýdarylady. Buqaralyq sport pen shyǵarmashylyq sheshimderdiń múmkindikterin belsendi paıdalaný qajettiligi atap ótildi.
Іshki ister mınıstri Erjan Sádenov esirtkiniń ınternet-saýdasyna qarsy is-qımyl jónindegi jumystyń jandanǵany týraly baıandady. «Kıbernadzor» júıesiniń kómegimen anyqtalǵan jáne buǵattalǵan saıttar sany 11 esege ósti. Barlyǵy 26,5 myńnan astam ınternet-resýrs jabyldy. 35 myńnan astam kartalyq shot buǵattaldy, 4 myńnan astam adam qylmystyq jaýapkershilikke tartyldy. Osy jyldyń 9 aıynda esirtkige qatysty 6 210 quqyq buzýshylyq anyqtaldy, 26,1 tonna esirtki alyndy.
Premer-mınıstr ІІM-ge jyl sońyna deıin ákimdikterdiń esirtkige qatysty quqyq buzýshylyqtardyń aldyn alý jónindegi qyzmetin baǵalaýdyń alǵashqy jınaqtalǵan reıtıngin daıyndaýdy tapsyrdy.
Densaýlyq saqtaý mınıstrligi esirtkige táýeldi adamdardy emdeý men ońaltýdyń tıimdiligin arttyrýǵa baǵyttalǵan sharalardy qabyldaýda. Narkologııa boıynsha klınıkalyq hattamalar qaıta qaraldy jáne emdeý sapasynyń halyqaralyq baǵdarlamasy engizilýde.
ІІM usynysy sheńberinde Mádenıet jáne aqparat mınıstrligimen, otandyq óndirýshilermen birlesip, halyqty esirtkige arnalǵan qoljetimdi ekspress-testermen, onyń ishinde áleýmettik osal toptardy tegin qamtamasyz etý máselesin pysyqtaý tapsyryldy. Bul bastapqy tutyný faktilerin anyqtaıtyn aldyn alý sharasy bolady. Sondaı-aq bir aı ishinde jekemenshik narkologııalyq ońaltý ortalyqtarynyń qyzmetin retteıtin quqyqtyq tásilderdi ázirlep shyǵarý talap etiledi.
Bilim berý salasy tarapynan profılaktıkalyq jumystar júrgizilýde: tárbıelik fýnktsııalardy pedagog-psıhologtar men áleýmettik pedagogtardy qosa alǵanda, 360 myń pedagog júzege asyrýda, oqýshylar qaýipsizdik sabaqtarymen 100% qamtylǵan, ata-analardy pedagogıkalyq qoldaýdyń 6,8 myń ortalyǵy jumys isteıdi. Sondaı-aq tıisti ádistemelik usynymdar ázirlendi.
Mádenıet jáne aqparat mınıstri Aıda Balaeva esirtkige qarsy nasıhat boıynsha júrgizilip jatqan jumystar týraly baıandady.
Oljas Bektenov profılaktıkalyq jumysta nasıhattaýdyń zamanaýı nysandary men ádisterin qoldaný qajettiligine nazar aýdardy. Tanymal onlaın-platformalarda, kınoteatrlarda, qoǵamdyq kólikterde jáne azamattardyń jappaı jınalatyn oryndarynda áleýmettik jarnamany ornalastyrýdyń mańyzdylyǵy atap ótildi. Osyny eskere otyryp, «Zań men tártip» tujyrymdamasyn júzege asyrý jónindegi aqparattyq jumysty túzetý tapsyryldy.
Budan bólek, Mádenıet jáne aqparat, Jasandy ıntellekt mınıstrlikteri Ulttyq qaýipsizdik komıtetimen birlesip, maqsatty jarnama men esirtki saıttaryn anyqtaýǵa jáne avtomatty túrde buǵattaýǵa belsendi túrde qosylýy kerek.
Sıntetıkalyq esirtkiniń jańa túrlerin anyqtaý úshin Ádilet mınıstrligi Sot saraptamasy organdaryn zamanaýı jabdyqtarmen jaraqtandyrý, sarapshylardy irikteý jáne daıarlaý, sondaı-aq rásimdi jetildirý jáne saraptama júrgizý ýaqytyn ońtaılandyrý qajet.
Shekaradaǵy ótkizý pýnktteri qazirgi zamanǵy tekserý quraldarymen, shekaralyq baqylaý men radıomonıtorıngtiń tehnıkalyq quraldarymen qamtamasyz etiletin bolady.
Óńirlerdiń ákimderine nashaqorlyqqa qarsy is-qımyl jónindegi oblystyq shtabtardy basqarý jáne osy jyldyń qazan aıynyń sońyna deıin jergilikti jaǵdaılar men bıýdjetterdiń múmkindikterin eskere otyryp, nashaqorlyqqa qarsy is-qımyl jónindegi naqty sharalardy ázirleý tapsyryldy.
Premer-mınıstr bul sharalardyń barlyǵy keshendi josparda kórinis tabýy tıis ekenin atap ótti.
Otyrys qorytyndysy boıynsha shtabtyń 2026 jylǵa arnalǵan jumys jospary maquldandy.
Aıta ketelik Almatyda bıyl jarty tonnadan astam esirtki tárkilendi.