Óńirler áleýmettik-ekonomıkalyq damýdyń nysanaly kórsetkishterine qol jetkizýi tıis - Úkimet basshysy
Jyl sońyna deıin barlyq óńir áleýmettik-ekonomıkalyq damýdyń nysanaly kórsetkishterine qol jetkizýi tıis. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy Kazinform.
«Jyl sońyna deıin barlyq óńirler áleýmettik-ekonomıkalyq damýdyń nysanaly kórsetkishterine qol jetkizýi tıis. Jeke ınvestıtsııalardy tartý ekonomıkalyq ósýdiń mańyzdy faktory bolyp tabylady. Bul – bizdiń basty mindetimiz. Memlekettik organdar men óńirler ınvestıtsııa tartý boıynsha jumys júrgizip, josparlanǵan jobalardyń iske asyrylýyn qamtamasyz etýi qajet. Sonymen qatar, Memleket basshysy árbir orta kásiporyn boıynsha óndiristi 2-3 esege keńeıtý mindetin qoıdy. Jaýapty memlekettik organdar, ákimdikter «Atameken» Ulttyq palatasymen birlesip, osy tapsyrmany iske asyrý jóninde naqty sharalar qabyldaýy qajet», - dedi Úkimet basshysy.
Premer-Mınıstr jumys istep turǵan óndiristerdi keńeıtý jáne jańa kásiporyndar qurý baǵytynda bıznesti belsendi qoldaý kerektigin basa aıtty.
«Der kezinde qabyldanǵan sharalardyń arqasynda biz ınflıatsııa deńgeıin 10,8 paıyzǵa deıin tómendetýge múmkindik aldyq. Sonymen qatar, jyl sońyna deıin ınflıatsııany 2 esege azaıtý úshin memlekettik organdar men ákimdikter Inflıatsııa deńgeıin baqylaý jáne tómendetý boıynsha sharalar keshenindegi barlyq josparlanǵan is-sharalardy tıimdi júzege asyrýdy qamtamasyz etý qajet. Jyl sońyna deıin 1,5 aı qaldy. Ekonomıkanyń ósý traektorııasyn saqtaı otyryp, barlyq nysanaly kórsetkishterdi qamtamasyz etý qajet. Sondaı-aq, bıýdjettik baǵdarlamalardyń ákimshileri osy jylǵa bólingen qarajatty ýaqtyly ıgerýge kóńil bólýi tıis», - dedi Álıhan Smaıylov.
