Óńirler 2026 jyly áleýmettik mańyzy bar kókónister men júgeri egisin ulǵaıtady
ASTANA.KAZINFORM - Úkimette Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen kóktemgi egis jumystaryn daıarlaý jáne ótkizý jónindegi jedel shtabtyń otyrysy ótti.
Aýyl sharýashylyǵy vıtse-mınıstri Azat Sultanovtyń habarlaýynsha, 2026 jyly óńirler áleýmettik mańyzy bar kókónisterdiń, eń aldymen kartop pen sábizdiń egis alqaptaryn ulǵaıtýy qajet.
Onyń aıtýynsha, ótken jyly kartop egisin arttyrý boıynsha maqsatty jumys júrgizilip, uıymdasqan sharýashylyqtardaǵy egis kólemi 12,5 myń gektarǵa ulǵaıǵan.
— Ónim kólemi naryqtaǵy baǵa turaqtylyǵyna tikeleı áser etedi. Osyǵan baılanysty óńirler túpkilikti egis qurylymyn bekitý kezinde sábiz egisin ulǵaıtý mindetin eskerýi qajet, - dep atap ótti vıtse-mınıstr.
Sondaı-aq boljamdy egis qurylymynda qaraqumyq egis alqaptaryn kezeń-kezeńimen ulǵaıtý kózdelgen. 2026 jyly onyń egisin 10 myń gektarǵa – 101 myń gektarǵa deıin keńeıtý josparlanyp otyr (2025 jyly – 91 myń gektar). Óńirlerge belgilengen ındıkatorlarǵa qol jetkizýdi qamtamasyz etý tapsyryldy.
Júgeri egisin keńeıtýge de erekshe nazar aýdaryldy. Alańdardyń aıtarlyqtaı ulǵaıýy Jambyl oblysynda júgerini tereń óńdeý boıynsha Fufeng Group kompanııasynyń jańa tik ıntegratsııalanǵan ónerkásiptik parkin, sondaı-aq Túrkistan oblysyndaǵy «Qazkrahmal» JShS-niń krahmaldy sirne óndirý zaýytyn shıkizatpen qamtamasyz etý úshin qajet.
Jańa óndiristerdiń qajettiligin tek ońtústik óńirler esebinen qamtamasyz etý múmkin emestigi atap ótildi. Osyǵan baılanysty úsh soltústik astyq egetin óńirde júgeri egis alqaptaryn árqaısysynda orta eseppen 15 myń gektarǵa ulǵaıtý mindeti qoıyldy.
Aýyl sharýashylyǵy mınıstrligi óz tarapynan Ulttyq agrarlyq ǵylymı-bilim berý ortalyǵymen jáne Memlekettik sort synaý komıssııasymen birlesip, óńirlerge ádistemelik jáne tehnologııalyq qoldaý kórsetýge daıyn ekenin bildirdi. Bul soltústik óńirlerdiń jaǵdaıyna beıimdelgen ósirý tehnologııalaryn engizý jáne sáıkes sorttardy irikteý bóliginde júzege asyrylady.
Qosymsha AShM júgeri ósirýde praktıkalyq kómek kórsetýge daıyn ekenin bildirgen qytaılyq kompanııamen kezdesý ótkizdi. Qytaı tarapy topyraq-klımattyq jaǵdaılary uqsas Qytaıdyń soltústik óńirlerinde júgeri ósirý tájirıbesimen bólisýge, sondaı-aq osyndaı jaǵdaılarǵa beıimdelgen tehnologııalar men sorttardy usynýǵa daıyn. Osyǵan baılanysty óńirlerge halyqaralyq tájirıbeni eskere otyryp, júgeri egisin keńeıtý baǵytyndaǵy jumysty jandandyrý usynyldy.
Sondaı-aq óńirlerde mıneraldy tyńaıtqyshtardy jóneltý bastalǵany atap ótildi. Aýyl sharýashylyǵy mınıstrligi «Qazfosfat» JShS-men 2026 jyly ammofostyń qosylǵan qun salyǵyn eseptemegendegi tonnasyna 254 myń teńge deńgeıinde (ótken jylmen salystyrǵanda 15%-ǵa joǵary) bekitilgen baǵa belgileý týraly memorandýmǵa qol qoıdy. Qazirgi ýaqytta aýyl sharýashylyǵy taýar óndirýshilerimen sharttar jasasý jáne jetkizý kestelerin kelisý jumystary júrgizilip jatyr.
2025 jyly kóktemgi egis jáne jınaý jumystaryn júrgizý úshin 7 myńnan astam aýyl sharýashylyǵy óndirýshisine jalpy somasy 501,5 mlrd teńge kóleminde kredıt berilip, 7 mln gektardan astam egis alqaby qamtyldy. Qazirgi ýaqytta Agrarlyq kredıt korporatsııasy arqyly egis naýqanyna 126 fermerge 17 mlrd teńge kóleminde qarjylandyrý maquldandy, taǵy 235 óndirýshiniń 76 mlrd teńgege ótinim qaralyp jatyr.
Aıta keteıik, bıyl joǵary marjınaldy daqyldardyń egisi arttyrylmaq.
3 jylda egis alqaptary tutynatyn sý kólemi 700 mln tekshe metrge azaıǵan.