Óńirdegi esepteý qýattarynyń eń iri haby qalaı qurylyp jatyr
ASTANA. KAZINFORM – Búgin Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev Derekterdi óńdeý ortalyqtarynyń alqabyna qatysty túsinik berdi.
- Tsıfrlyq ekonomıkanyń basty jobalarynyń biri – qýaty keminde 1 gıgavatt bolatyn «Data-tsentrler alqaby». Ekibastuzda jer ýchaskesi bólindi. Joba operatory anyqtaldy. Injenerlik ınfraqurylym jáne GRES-1-den elektr energııasymen qamtamasyz etildi. Alǵashqy nysandardyń qurylysy bastaldy, - dedi J.Mádıev.
Budan bólek ol kelesi jyly jalpy qýaty 186 megavatt bolatyn data-tsentrlerdi paıdalanýǵa berý josparlanǵanyn aıtty.
- 2028 jyldyń ekinshi toqsanynda taǵy 109 megavatt qýatty iske qosý kózdelgen. Firebird AI kompanııasymen 10 mlrd AQSh dollary kólemindegi kelisimderge qol qoıyldy. Jobaǵa 20-dan astam halyqaralyq tehnologııalyq kompanııa men ınvestor qyzyǵýshylyq tanytyp otyr. Bizdiń mindetimiz – esepteý qýattarynyń óńirdegi eń iri habyn qalyptastyrý, - dedi mınıstr.
Buǵan deıin habarlanǵandaı, jaqynda Memleket basshysy Qasym-Jomart Toqaev NVIDIA kompanııasynyń vıtse-prezıdenti Rev Lebaredıanmen kezdesti.
Bul rette Rev Lebaredıan Qazaqstandaǵy jasandy ıntellekt ınfraqurylymynyń damý barysyn joǵary baǵalap, NVIDIA kompanııasynyń «Derekterdi óńdeý ortalyqtarynyń alqaby» jobasynyń kelesi kezeńine qatysýǵa nıetti ekenin jetkizdi.
