ІІ óńiraralyq yntymaqtastyq forýmy: Qazaqstan men Qyrǵyzstan qandaı qujattarǵa qol qoıdy
ASTANA. KAZINFORM — Bishkekte Qazaqstan men Qyrǵyzstannyń II óńiraralyq yntymaqtastyq forýmy ótip jatyr. Jıyn barysynda óńiraralyq, vedomstvoaralyq jáne iskerlik áriptestik jónindegi 14 qujatqa qol qoıyldy, dep habarlaıdy Kazinform agenttiginiń Bishkektegi menshikti tilshisi.
Forýmǵa Qazaqstan Premer-mınıstri Oljas Bektenov pen Qyrǵyz Respýblıkasynyń Mınıstrler kabınetiniń tóraǵasy – Prezıdent Ákimshiliginiń basshysy Ádilbek Qasymalıev teń tóraǵalyq etip otyr.
Óńiraralyq yntymaqtastyq boıynsha mynadaı qujattarǵa qol qoıyldy:
* Qazaqstannyń Shyǵys Qazaqstan oblysy ákimdigi men Qyrǵyz Respýblıkasy Prezıdentiniń Ystyqkól oblysyndaǵy ókiletti ókiliniń apparaty arasyndaǵy yntymaqtastyq týraly memorandým.
Qazaqstannyń Aqmola oblysyndaǵy Şýchınsk-Býrabaı kýrorttyq aımaǵy men Qyrǵyz Respýblıkasynyń Ystyqkól oblysyndaǵy Ystyqkól kýrorttyq aımaǵy arasynda baýyrlastyq baılanys ornatý jáne yntymaqtastyqty damytý týraly kelisim.
* Qazaqstannyń Almaty oblysy men Qyrǵyz Respýblıkasy Prezıdentiniń Jalal-Abad oblysyndaǵy ókiletti ókili apparaty arasyndaǵy ózara túsinistik týraly memorandým.
* Qazaqstannyń Qyzylorda oblysy men Qyrǵyz Respýblıkasy Prezıdentiniń Jalal-Abad oblysyndaǵy ókiletti ókili apparaty arasyndaǵy ózara túsinistik týraly memorandým.
* Qazaqstannyń Qaraǵandy oblysy men Qyrǵyz Respýblıkasy Prezıdentiniń Jalal-Abad oblysyndaǵy ókiletti ókili apparaty arasyndaǵy ózara túsinistik týraly memorandým.
* Qazaqstannyń Jetisý oblysynyń ákimdigi men Qyrǵyz Respýblıkasy Prezıdentiniń Naryn oblysyndaǵy ókiletti ókili apparaty arasyndaǵy yntymaqtastyq týraly memorandým.
* Almaty qalasynyń ákimdigi men Bishkek qalasynyń ákimdigi arasyndaǵy 1997 jylǵy 12 jeltoqsandaǵy baýyrlastyq baılanys ornatý týraly kelisimdi iske asyrý jónindegi 2026-2030 jyldarǵa arnalǵan is-sharalar jospary.
• Túrkistan qalasy men Qyrǵyzstannyń Jalal-Abad oblysyndaǵy Manas qalasy arasynda baýyrlastyq baılanys ornatý týraly memorandým.
Densaýlyq saqtaý salasynda mynadaı qujatqa qol qoıyldy:
* Qazaqstan men Qyrǵyzstannyń Densaýlyq saqtaý mınıstrlikteri arasyndaǵy dárilik zattar men medıtsınalyq buıymdardy memleketaralyq satyp alý jónindegi yntymaqtastyq týraly kelisim.
Іskerlik yntymaqtastyq baǵytynda mynadaı qujattarǵa qol qoıyldy:
* Qazaqstandyq «Dobrye Tradıtsıı» kompanııasy men Qyrǵyzstannyń «Prod Impeks» JShQ arasyndaǵy konservilengen ónimderdi jetkizý týraly kelisimshart.
* Qazaqstandyq «Dobrye Tradıtsıı» JShS men Qyrǵyzstannyń «Alaıký Organıks» JShQ arasyndaǵy ulttyq sýsyndardy jetkizý jónindegi dıstrıbıýtorlyq kelisim.
* Qazaqstannyń «Satu Company» JShS men Qyrǵyzstannyń «Alaıký Organıks» JShQ arasyndaǵy ulttyq sýsyndardy jetkizý jónindegi dıstrıbıýtorlyq kelisim.
* Qazaqstannyń «Astana Motors» kompanııasy men Qyrǵyzstannyń «Trast Tehnolodjıs» JShQ (IVOX Group) kompanııasy arasyndaǵy qazaqstandyq óndiristiń kommertsııalyq jáne arnaıy tehnıkasyn Qyrǵyzstan naryǵynda ilgeriletý jónindegi yntymaqtastyq týraly kelisim.
* Qazaqstandyq GT OilService kompanııasy men Qyrǵyzstannyń «Tan Auto» JShQ arasyndaǵy FerTurino motor maıyn Qyrǵyzstan naryǵynda ilgeriletý jónindegi yntymaqtastyq týraly memorandým.
Eske sala keteıik, Qazaqstan Premer-mınıstri Oljas Bektenovtiń resmı saparmen Qyrǵyzstanǵa barǵanyn habarlaǵan bolatynbyz.
Sonymen qatar Bishkekte Qazaqstan men Qyrǵyzstannyń II óńiraralyq jıyny bastalǵanyn jazǵan edik.
Budan bólek Qazaqstan men Qyrǵyzstan saýda kólemin 3 mlrd dollarǵa jetkizýdi kózdeıtinin habarlaǵan bolatynbyz.
