Óńir úshin sý qaýipsizdigi máselesi asa ózekti —Prezıdent

TAShKENT. KAZINFORM — Bul týraly Memleket basshysy Qasym-Jomart Toqaev Ortalyq Azııa memleketteri basshylarynyń VII Konsýltatıvtik kezdesýinde aıtty.

Prezıdenttiń aıtýynsha, óńir úshin sý qaýipsizdigi máselesi asa ózekti

– Sońǵy bes jylda elderimiz sý saıasatyna qatysty ustanymdaryn jańǵyrtty. Sý problematıkasynyń transshekaralyq sıpatyn eskere otyryp, salalyq strategııamyzdy úılestirý mańyzdy dep sanaımyn. Bul bir jaǵynan sý únemdeýdiń anaǵurlym sátti tájirıbelerin keńinen taratý úshin qajet. Aldaǵy ýaqytta halyqaralyq standarttarǵa sáıkes Ortalyq Azııanyń sýdy paıdalaný jónindegi negizdemelik konventsııasyn qabyldaýdy oılastyrýǵa bolady. Mundaı qujat saladaǵy biryńǵaı jumys qaǵıdattaryn bekitip, yqtımal qarama-qaıshylyqtardyń aldyn alýǵa múmkindik beredi. Kelesi jyly sáýir aıynda Astanada Óńirlik ekologııalyq sammıtimen qatar ótetin Halyqaralyq Araldy qutqarý qoryna múshe memleketter basshylarynyń jıynynda osy taqyrypqa oralyp, usynystardy talqylaı alamyz. Sizder atalǵan is-sharalarǵa belsendi qatysady dep senemin, – dedi Memleket basshysy. 

Aıta ketelik Qasym-Jomart Toqaev Ortalyq Azııa memleketteri basshylarynyń VII konsýltatıvtik kezdesýine qatysý úshin Tashkenttegi Kongress ortalyqqa barǵanyn jazǵan edik.