Óńir ákimdikteriniń egin jınaý statıstıkasynda sáıkessizdik bar – Aıdarbek Saparov
ASTANA. KAZINFORM – Aýyl sharýashylyǵy mınıstri Aıdarbek Saparov oblys ákimdikterinen egin, astyqqa qatysty derekterdiń durystyǵyn qamtamasyz etýdi jáne olardy statıstıkaǵa sáıkes keltirýdi tapsyrýdy surady.
«Óńir ákimdikteri usynatyn jedel derekter men resmı statıstıka arasynda sáıkessizdik bar. Jyl saıyn egis jáne egin jınaý jumystarynyń qorytyndylary boıynsha beriletin jedel derekter 4-SH jáne 29-SH nysandary boıynsha statıstıkalyq eseptermen sáıkes kelmeıdi. Osyǵan baılanysty, oblys ákimdikterine derekterdiń durystyǵyn qamtamasyz etýdi jáne olardy statıstıkaǵa sáıkes keltirýdi tapsyrýdy suraımyn. Jańa ónimdi saqtaý máselesi asa mańyzdy bolyp otyr. Respýblıkadaǵy astyq saqtaý qoımalarynyń jalpy syıymdylyǵy 30 mln tonnany quraıdy. Astyq qabyldaý kásiporyndarynda astyq qabyldaý jalǵasýda, qabyldanǵan astyqtyń 57%-y 3-shi synypqa sáıkes keledi», - dedi Aıdarbek Saparov Úkimet otyrysynda.
Sonymen qatar mınıstr óńir ákimdikteri astyqty korporatsııaǵa tapsyrý, eksportqa jóneltý jáne basqa aımaqtarǵa ýaqytyly tasymaldaý úshin elevatorlardyń táýlik boıy qabyldaýdy qamtamasyz etýi qajettigin aıtty. Onyń aıtýynsha, elevatorlardyń táýlik boıy jumys isteýi úshin barlyq tıisti jaǵdaı jasalǵan.
«Jınaý jumystaryna bólingen 362 myń tonna jeńildikti dızel otynyna qosymsha, astyqty keptirý úshin taǵy 68 myń tonna jeńildikti dızel bólindi. Budan bólek, suıytylǵan gazben jumys isteıtin astyq keptirgish qondyrǵylar úshin 22 myń tonna gaz bólindi. Astyq naryǵyndaǵy aǵymdaǵy jaǵdaıdy eskere otyryp, korporatsııa bıdaıdy forvardtyq satyp alý baǵalaryn belgiledi. Bıyl egin, egistikke bólingen qarajat barlyq qajetti materıaldyq qundylyqtardy satyp alýǵa múmkindik berdi», - deıdi ol.
Odan bólek, vedomstvo basshysy 2025 jylǵa arnalǵan qarjylandyrý bıylǵy jeltoqsanda bastalatynyn aıtty. Málimdeýinshe, bul kóktemgi egis jumystaryna ýaqytyly daıyndalýǵa jáne jańa maýsymdy keshiktirmeı bastaýǵa múmkindik beredi.
Aıta keteıik, elimizde egin jınaý maýsymy aıaqtaldy. Bıyl egistiń ortasha ónimdiligi 16 ts/ga boldy.
