Onomastıkalyq sheshim qabyldaýda jaýapkershiliktiń satyly deńgeıi engiziledi - D.Myńbaı
ASTANA. 12 jeltoqsan. QazAqparat - Onomastıkalyq sheshim qabyldaýda jaýapkershiliktiń satyly deńgeıi engiziledi.
Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine onomastıka máseleleri boıynsha ózgerister men tolyqtyrýlar engizý týraly» zań jobasy jóninde baıandaǵan QR Mádenıet jáne aqparat mınıstri Darhan Myńbaı osylaı málim etti.
«Bul rette respýblıkalyq mańyzy bar qalalardyń, astananyń nysandaryna, kóshelerine jáne qalanyń basqa da quramdas bólikterine ataý berý jáne qaıta ataý máseleleri Respýblıkalyq onomastıkalyq komıssııa deńgeıinde qaralady jáne odan kelisim alý usynylady. Sáıkesinshe, aýdandarda, aýdandyq mańyzy bar qalalarda oblystyq onomastıkalyq komıssııanyń mindetti túrdegi kelisimin alý kózdeledi», - dedi Darhan Myńbaı.
Sonymen qatar, zań jobasymen jergilikti atqarýshy organdardyń kórneki aqparatty rásimdeý isi boıynsha baqylaýdy júrgizý quzyreti engiziledi.
«Onomastıkalyq jumystardyń ólshemderin belgileý normasy da zań jobasymen alǵash ret engizilip otyr. Atap aıtsaq, ataý berý jáne qaıta ataý jumystaryn júrgizgen kezde tarıhı, geografııalyq, tabıǵı, mádenı erekshelikterdi eskerý, ádebı til normalaryn saqtaý usynylady», - deıdi D. Myńbaı.
