Onomastıkalyq komıssııalar kóp jaǵdaılarda nysandarǵa belgisiz adamdardyń atyn berip otyrǵan - D. Myńbaı
ASTANA. 27 jeltoqsan. QazAqparat - Oblystyq onomastıkalyq komıssııalar kóp jaǵdaılarda nysandarǵa belgisiz adamdardyń atyn berip otyrǵan.
Bul týraly búgin Senattyń plenarlyq otyrysynda «Qazaqstan Respýblıkasynyń keıbir zańnamalyq aktilerine onomastıka máseleleri boıynsha ózgertýler men tolyqtyrýlar engizý týraly» Zań jobasyn tanystyrý kezinde QR Mádenıet jáne aqparat mınıstri Darhan Myńbaı málim etti.
Mınıstr Táýelsizdik alǵannan bergi ýaqytta elimizde kóptegen eldi mekender men kóshelerdiń ataýlary ózgertilip, tarıhı ádildik qalpyna keltirilgenin, onomastıka salysynda úlken jumys atqarylǵanyn tilge tıek etti. Sońǵy 5 jylda respýblıkada ataýlardy berý men ataýdy aýystyrý boıynsha onomastıkalyq jumystardy júrgizýge ýaqytsha moratorıı jarııalandy. Onyń aıtýynsha, osy ýaqyttyń ishinde birqatar máseleler týyndap, onyń nátıjesinde onomastıkalyq salada zańnamalyq bazany jetildirý qajettiligi baıqaldy.
D. Myńbaıdyń sózine qaraǵanda, oblystyq onomastıkalyq komıssııalardyń ashyq ári júıelik sheshimderdi jetkiliksiz deńgeıde qabyldaýynyń saldarynan kóptegen jaǵdaılarda eldiń aldynda eńbegi joq belgisiz adamdardyń atyn nysandarǵa negizsiz berý oryn aldy. Kóp jerlerde óz yqtııarlarymen kóshe ataýlaryn aýystyrý sánge aınalǵan. Bul óz kezeginde qoǵam tarapynan syn týdyrýda. Sondyqtan da Úkimet osy problemany sheshý úshin zańnamaǵa tıisti ózgertýlerdi ázirledi.
