Ónimsiz deldaldar elektrmen jabdyqtaý tizbeginen shyǵarylady
ASTANA. KAZINFORM – Memleket basshysynyń ekonomıkany demonopolızatsııalaý jáne jasandy túrde qurylǵan deldaldyq tizbekterdi joıý jónindegi tapsyrmasyn iske asyrý sheńberinde Úkimet energııamen jabdyqtaý naryǵynda tártip ornatýǵa kiristi. Basty maqsat – tutynýshylar úshin elektr energııasynyń túpkilikti qunyn negizsiz kóteretin deldaldardy alyp tastaý. Bul týraly Úkimettiń baspasóz qyzmeti málimdedi.
Premer-Mınıstr Oljas Bektenovtiń tapsyrmasy boıynsha bıylǵy 1 sáýirden bastap naryqta 2004 jyldan beri jumys istep kele jatqan jáne bıznes pen birqatar bıýdjettik uıymdar úshin tarıfterdiń mólsherin derbes belgileı alatyn rettelmeıtin energııamen jabdyqtaýshy uıymdardyń (budan ári - EJU) jumysy toqtatyldy. Bul rette taldaý kórsetkendeı, mundaı kompanııalardyń tabystylyǵy 1 kVtsaǵ úshin shamamen 30-50% nemese 5-20 teńge bolǵan.
Rettelmeıtin EJU-dan túsken paıda energetıkalyq júıeni jańǵyrtýǵa paıdalanylmady. QR Parlamenti Májilisiniń birinshi oqylymynda maquldanǵan «Jylý energetıkasy týraly» jańa zań aıasynda ónimsiz deldaldardy joıý jumystary jalǵasatyn bolady. Elektrmen jabdyqtaý naryǵyndaǵy qazirgi problemalardy sheshý úshin QR Úkimeti birinshi kezeńde rettelmeıtin EJU qyzmetin shekteý týraly sheshim qabyldady.
Ekinshi kezeńde elektrmen jabdyqtaý salasyn óńirlik elektr jelileri kompanııalaryna berý qarastyrylady. Bul elektr energııasynyń tarıfine jaǵymdy áser etedi, sonymen qatar kelesideı oń áserlerge ákeledi:
zańdy tulǵalar úshin tarıfterdi tómendetý, tıisinshe, bızneske júktemeni azaıtý, bul halyq úshin túpkilikti ónim baǵasynyń teń sharttary men tómendeýin qamtamasyz etedi;
bıýdjet qarajatyn únemdeýge alyp keletin jáne únemdelgen qarajatty áleýmettik mańyzy bar jobalarǵa baǵyttaýǵa múmkindik beretin bıýdjettik uıymdar úshin tarıfti tómendetý;
sońǵy tutynýshylar úshin tarıfke eń az áser ete otyryp, energetıka sektoryna ınvestıtsııalardy ulǵaıtý. Osyndaı jumystar ónimsiz deldaldar kesirinen baǵanyń negizsiz kóterilýi baıqalatyn ózge de salalarda júrgiziletin bolady.