Ónim bólisý kelisimi: Mınıstr ekologterdiń usynysyna jaýap berdi
ASTANA. KAZINFORM — Úkimet otyrysynan keıin ótken baspasóz máslıhatynda Ekologııa jáne tabıǵı resýrstar mınıstri Erlan Nysanbaev munaı kompanııalarymen memleket arasyndaǵy ónim bólisý kelisimderinde ekologııa máselelerin qanshalyqty eskerilgenin aıtty.
— Vadım Nı sııaqty ekologtar eldegi iri munaı óndiretin ınvestorlarmen jasalǵan ónim bólisý kelisimderiniń ekologııalyq talaptary energetıkterge málim bolǵanymen, ekologterdiń qoly jetpeı otyrǵanyn aıtty. Kelisimderdi qaıta qaraǵan kezde ekologııalyq talaptardy kópshilikke ashyq etý týraly usynysqa baılanysty mınıstrliktiń ustanymy qandaı, — dep surady BAQ ókili.
Ekologııa jáne tabıǵı resýrstar vıtse-mınıstri Jomart Álıev atalǵan ónim bólisý kelisimderi Qazaqstannyń ekologııa týraly zańnamasyna baǵynatynyn aıtty.
— Kez kelgen jer qoınaýyn ıgerý týraly kelisimshartta qorshaǵan ortany qorǵaý baǵytyn qamtıtyn bólek bólim bar. Búgingi tańda eshbir kelisimshart ekologııa zańnamasyna qaıshy kelmeıdi. Ol talaptarda merdiger nemese ınvestor qorshaǵan ortany qorǵaý baǵytyndaǵy ulttyq zańnamanyń búkil talaptaryn saqtaýǵa mindetteletini aıtylǵan. Sondyqtan qorshaǵan ortany qorǵaý zańnamasy jer qoınaýyn ıgerýshilermen kelisimshart qashan jáne kimmen jasalǵanyna qaramastan tolyq saqtalyp otyr. Kómirsýtegin ıgerý baǵytynda qorshaǵan ortany qorǵaý zańnamasynyń saqtalýyn baqylaý retteý isinde eshbir quqyqtyq, zańgerlik qıyndyq joq, — dedi vıtse-mınıstr.
Mınıstr Erlan Nysanbaev orynbasarynyń jaýabyn qýattady.
— Ár ınvestor tabıǵat qorǵaý josparyn bekitken. Sol jospardy oryndaýǵa naqty qarajat bólý qarastyrylǵan. Biz soǵan qarap olardyń ekologııany qorǵaý máselesine qalaı qarap otyrǵanyn bilip otyramyz. Sol sebepten bul jerde problema joq. ıAǵnı, ónim bólisý kelisimderin qaıta qaraǵan kezde ekologııalyq talaptardy ashyq etýdiń eshqandaı qajettiligi joq, — dedi mınıstr.
Eske salsaq, Save the Caspian Sea qozǵalysynyń negizin qalaýshy Vadım Nı munaı kenishteriniń ónimin bólisý kelisimderin uzartqan kezde ekologııalyq talaptardy kópshilikke ashyq etýdi usynǵan bolatyn.