OnlineMektep bilim platformasy ZOOM júıesimen ıntegratsııa jasady
ALMATY. QazAqparat - OnlineMektep bilim platformasy men ZOOM júıesiniń ıntegratsııasy jasyryn kıber-buzaqylardyń shabýyldarynan qorǵanýǵa jáne portal qoldanýshylarynyń tanymal halyqaralyq vıdeo-konferentsııa qyzmetin tegin paıdalanýyna múmkindik beredi. Bul týraly karantın jaǵdaıynda elimizdegi mektepterde qashyqtan oqytýdy uıymdastyrý máseleleri jóninde Ortalyq kommýnıkatsııalar qyzmetinde ótken baspasóz-konferentsııasynda aıtyldy, dep habarlaıdy QazAqparat tilshisi.
Bárimizge belgili, kóktemde COVID-19 pandemııasynyń taralýyna baılanysty qazaqstandyq mektepter jappaı qashyqtan oqytý júıesine kóshti. Muǵalimder men oqýshylar oqý jylynyń IV toqsanyn qashyqtan oqyp, kópshiligi jańa oqý jylyn da osy formatta jalǵastyryp jatyr.
Biraq eriksiz mindettelgen qashyqtan oqytý formaty týraly negizsiz pikirler qalyptasyp, túrli qıyndyqtar týyndady. Qashyqtan oqytý júıesiniń jumysy qalaı júredi jáne ony kimder uıymdastyrady? Kontent pen oqytý ádistemesiniń qandaı túrleri qoldanylady? Kıber-buzaqylardyń shabýyldarynan qorǵanýdyń joldary qandaı? Kópshiliktiń kókeıinde osyndaı ózekti suraqtar týyndady.
Qashyqtan oqytýdy uıymdastyrý jáne onyń ádistemelik ári tehnıkalyq erekshelikteri tóńireginde osy jáne ózge de suraqtarǵa qazaqstandyq pedagogtar men oqýshylar arasynda keń qoldanysqa ıe OnlineMektep bilim platformasynyń mamandary jaýap berdi. Brıfıngke túrli platforma men jańa tehnologııalyq quraldardy belsendi paıdalanyp júrgen elorda men ózge aımaqtardaǵy mektep muǵalimderi qatysty.
Baspasóz jıynyna qatysýshylar OnlineMektep platformasynda ár synypqa jeke sabaq kestesin qurý, arnaıy daıyndalǵan kontent kómegimen oqytýdyń tıimdi joldaryn uıymdastyrý, beıne-sabaqtar ótkizý, oǵan qosa, úı tapsyrmasyn berý jáne ony tekserý, muǵalim men oqýshy baılanysyn qamtamasyz etýge qatysty aqparat berip, portal jumysymen tanystyrdy.
Jıyn barysynda joba mamandary OnlineMektep portaly men álemde vıdeokonferentsııa qyzmetin uıymdastyrý boıynsha óte tanymal ZOOM platformasynyń ıntegratsııasy jasalyp jatqanyn málimdedi. Mundaı ıntegratsııa qazaqstandyq muǵalimder men oqýshylardyń ZOOM múmkindikterin tegin paıdalanyp, sondaı-aq, kıber-buzaqylardyń shabýyldarynan saqtanýyn qamtamasyz etedi.
Bul áleýmettik joba bolǵandyqtan mamandar platforma qyzmetine (jumysyna) qyzyǵýshylyq tanytqan ár adamnyń suraǵyna jaýap berip, pikirin tyńdaýǵa daıyn ekenderin jetkizdi.
«Bıyl elimizdegi 3,5 myń mektep OnlineMektep negizinde oqytýǵa kóshti. 1 qyrkúıekten bastap kúndelikti 1,5 mıllıon oqýshy osy platforma arqyly bilim alýda. Saıtqa kúndelikti mıllıonnan asa jeke qoldanýshy kiredi, saıt betteriniń kórilimi shamamen 30 mıllıonǵa jýyq. Platforma Bilim Media Group kompanııasy men «Nazarbaev zııatkerlik mektepteri» AQ seriktestigi negizinde jasalǵan. Sabaq materıaldaryn daıyndaý jáne portal qyzmetin jaqsartý jumystaryna kompanııa qyzmetkerleri men NZM úzdik muǵalimderi, jalpy sany 800-den asa maman atsalysýda. Qazir platformaǵa oqý jylynyń I toqsanyndaǵy 42 pán boıynsha 2 tilde 5 700 sabaq pen 140 myń jattyǵý júktelgen. Oqý jyly bastalǵaly beri muǵalimder portalda 3 mıllıonnan asa onlaın-sabaq ótkizdi, saıt betteriniń qaralymy 160 mıllıonǵa jetip, 500 mıllıonǵa jýyq jattyǵý (tapsyrma) oryndalǵan. Ár sekýnd saıyn 70 myńnan 80 myńǵa deıin jeke qoldanýshy platforma qyzmetin bir mezette paıdalanady. Portal kontentin ázirleýde oqytýdy jeke tulǵaǵa beıimdeý jáne elimizde ozyq tehnologııalardy qoldaný erekshelikteri eskerildi. Platforma qoldanýshylary vırtýal synyptar men jeke toptardy, arnaıy sabaq kestelerin, synyppen nemese árbir oqýshymen jeke sóılesý chatyn quryp, vıdeo-konferentsııa rejıminde sabaq ótkizedi. Oqytýshy oqýshyǵa úı tapsyrmasyn beredi, ony tekserip ári baǵalaı alady. Sondaı-aq, muǵalim qalaýy boıynsha arnaıy konstrýktor arqyly jeke sabaǵyn daıyndaı alady», - dedi Bilim Media Group dırektory, OnlineMektep jobasynyń jetekshisi Sanjar Kenjehanuly.
Qazir OnlineMektep.org komandasy oqý jylynyń II toqsanyna arnalǵan kontentti daıyndaýmen aınalysyp jatyr. Ol kúntizbelik-taqyryptyq josparǵa sáıkes, shamamen 6 myńdaı sabaqtan jáne 150 myńnan asa jattyǵýdan turady.
