Onlaın ýnıversıtetter lıtsenzııa alýy tıis - BǴM
NUR-SULTAN. QazAqparat - Qazaqstandaǵy onlaın ýnıversıtetterge lıtsenzııa alý mindetteledi. Bul týraly QR Bilim jáne ǵylym mınıstrliginiń alqa otyrysynda usynyldy, dep habarlaıdy QazAqparat tilshisi.
«Onlaın-oqytýdyń talaptaryn ázirlep, onlaın-ýnıversıtetter men tutas onlaın oqytýdy lıtsenzııalaý máselesin qolǵa alǵan jón. Sonymen birge, joǵary bilimi bar mamandardy, ásirese pedagogıkalyq baǵyttaǵy mamandardy ázirleýdiń keı baǵyttary boıynsha talaptardy qaıta qaraý kerek. Jańa ýnıversıtetterdiń ashylýy «Pedagog mártebesi týraly» zań jobasynda kórsetilgendeı, Úkimettiń kelisimimen júrgziliýi tıis», - dedi QR BǴM Bilim jáne ǵylym salasyn baqylaý komıtetiniń tóraıymy Gúlzat Kóbenova.
Óz kezeginde QR Bilim jáne ǵylym mınıstri Ashat Aımaǵambetov onlaın ýnıversıtetterdiń jumysy týraly pikir bildirdi.
«Onlaın-oqytý qazirgi zamannyń kórinisi. Qalasaq ta, qalamasaq ta, bul qyzmetti zań júzinde retteýimiz kerek. Muny (Onlaın oqytýdy - red.) teriske shyǵaryp otyrǵan joqpyz, kerisinshe osyndaı oqý oryndaryna belgili bir talaptar qoıýymyz kerek. Basqa JOO-lar lıtsenzııa alyp, dıplom berip jatqanda, qashyqtyqtan oqytatyn JOO-lardyń quqyqtyq aıada jumys istemeı-aq dıplom berýi durys emes. Barlyǵyna biliktilik talaptary qoıylyp, lıtsenzııa berilýi tıis. Sapa men bilim berý talaptaryna saı kelgender ǵana bilim berýi tıis», - dedi mınıstr Aımaǵambetov.
