Onlaın tapsyrysqa kimder 21 paıyz alym tóleıdi
ASTANA. KAZINFORM — Memlekettik kirister komıteti Ádisteme departamenti Keden ádistemesi basqarmasynyń bas sarapshysy Marhabat Omarova vedomstvonyń onlaın baspasóz máslıhatynda Eýrazııalyq ekonomıkalyq keńestiń onlaın tapsyrystardy retteý tártibi qarapaıym qazaqstandyqtarǵa qalaı áser etetinin aıtty.
— Jańa kedendik talaptyń áserin qarapaıym tapsyrys berýshiler sezinbeıdi de. Ózgeristi sálemdemesiniń quny 200 eýrodan joǵary tapsyrys berýshiler kóbirek sezinedi. Kedennen bajsyz taýar kirgizýdiń tómengi shegi bul, ıaǵnı sizdiń tapsyrys arqyly alǵyzatyn taýar baǵasy 200 dollardan az bolsa, eshqandaı baj, tólem, salyq tólemeısiz. Bul qazirgi baǵammen alǵanda 115 myń teńgeniń aınalasy. Buryn qalaı alyp júrdińiz, solaı ala beresiz. Biraq kedennen ótken taýardyń baǵasyna qaramaı bárine birdeı deklaratsııa tapsyrylýy kerek, — dedi ol.
Aıtýynsha, qazir Qazaqstanǵa syrttan onlaın tapsyrys arqyly kiretin taýarlardyń 90 paıyzdan astamy 200 eýrodan arzan taýarlar bolyp otyr.
— Osynsha taýar qazir deklaratsııasyz irip jatyr degen sóz. Keden organdary kim neni, qaıdan alyp jatqanyn jiti qadaǵalap otyrǵan joq. Al onyń arasynda zııandy nemese qaýipti taýar da bolýy múmkin. Sondyqtan búkil taýar deklaratsııalanýy kerek degen talap enip jatyr. Qazir joba aıasynda soǵan qatysýshy kompanııalar búkil tapsyrysyn deklaratsııalap bastap ketti. Bolashaqta elektrondy saýda operatorlary qarapaıym tutynýshylardyń ornyna ár taýarǵa deklaratsııa tapsyrady. Sonda bul ózgeristerdiń halyqtyń basym kópshiligine áser etpeıdi dep topshylap otyrmyz, — dedi memkiris ókili.
Onyń sózinshe, onlaın tapsyrys arqyly alǵyzatyn sálemdemesiniń quny 200 eýrodan asatyn satyp alýshylardyń bári jańasha baj tóleıtin bolady.
— Qazir quny 200 eýrodan artyq tapsyrystyń shekten artylǵan somasynan ǵana 15 paıyz kóleminde baj tólep júrsek, qazir taýardy búkil qunynyń 5 paıyzyna baj tóleımiz. Bul Eýrazııalyq ekonomıkalyq komıssııanyń sheshimi. Osy sheshimdi talqylaǵan kezde bajdyń kólemi 20, 30 paıyz bolsyn degen de usynystar boldy. Biraq Qazaqstan taraby 5 paıyz degen mólsherlemeni saqtap qaldy. Munyń syrtynda qosylǵan qun salyǵy bar. Sonda onlaın tapsyrys arqyly alǵyzatyn sálemdemeniń quny 200 eýrodan asyp ketse, búkil qunynyń 21 paıyzy kóleminde alym tóleısiz, — dep túsindirdi Marhabat Omarova.
Sondaı-aq, ol 200 eýro deıtin shek bir sálemdemeniń quny ekenin, bir aıda nemese bir aptada, bir jylda degen merzimmen shekteý bolmaıtynyn aıtty.
— 200 eýro bir sálemdeme qunyna esepteledi. Mysaly, birneshe taýardy bir trek-nómirmen, bir ýaqytta bir sálemdeme arqyly alǵyzsańyz jáne báriniń baǵasy 200 eýrodan aspasa, eshqandaı qosymsha alym tólemeısiz. Bir taýardyń quny 200 eýrodan asyp ketse de baj tóleısiz, — dedi komıtet sarapshysy.
Marhabat Omarova elektrondy saýdanyń bir deklaratsııasynda 999 taýarǵa deıin kórsetýge bolatynyn aıtty. Pılottyq jobaǵa qatysyp jatqan operatorlar jeke tulǵalardan tapsyrysyna deklaratsııa tapsyrǵany úshin aqy alyp jatpaǵanyn da aıtty. Ondaı qyzmetke aqy suraǵan jaǵdaıda tapsyrys berýshi jeke tulǵa ózi de deklaratsııa tapsyra alady.
Eske salsaq, Májilis depýtaty Marhabat Jaıymbetov onlaın saýdanyń damýy elimizge ekologııalyq zalal keltirip jatyr dep másele kótergen bolatyn.
