Onlaın saýdanyń damýy elimizge ekologııalyq zalal keltirip jatyr — depýtat
ASTANA. KAZINFORM — Májilis depýtaty Marhabat Jaıymbetov Premer-Mınıstr Oljas Bektenovtiń atyna joldaǵan saýalynda bir rettik qoldanýǵa arnalǵan qaptamanyń ekologııalyq keri áseri týraly máseleni kóterdi.
— Sońǵy jyldary elektrondyq saýda ekonomıkanyń mańyzdy segmentine aınalyp, onlaın-platformalar arqyly saýda jasaý keń tarady. Saýda jáne ıntegratsııa mınıstrliginiń málimetine sáıkes, 2025 jyly elektrondyq saýdaǵa qatysty 18 237 ótinish tirkelip, bul sala tutynýshylyq qatynastardyń mańyzdy bóligine aınalǵanyn kórsetedi. Onlaın saýdanyń keńeıýi bir jaǵynan halyqqa úlken qolaılylyq ákelse, ekinshi jaǵynan ekologııalyq máselelerdi de alǵa shyǵaryp otyr. Oǵan birneshe sebep bar.
Birinshiden, taýardy zaqymdanbaı jetkizý úshin plastık, plenka, karton sekildi kóptegen «shyǵyn materıaly» qoldanylady. Jetkizilgennen keıin olardyń basym bóligi qoqysqa tastalady. Saldarynan turmystyq qatty qaldyqtar quramyndaǵy qaptama úlesi artyp, polıgondarǵa túsetin júkteme jyldan-jylǵa kóbeıip keledi, — dedi Marhabat Jaıymbetov Májilistiń jalpy otyrysynda.
Onyń paıymynsha, elektrondyq saýdanyń damýy ekologııalyq jaýapkershilikpen qatar júrýi tıis. Tabıǵatty qorǵaý — tek memlekettiń ǵana emes, bıznes pen qoǵamnyń da ortaq mindeti.
— Osyǵan baılanysty elektrondyq saýda salasynyń qarqyndy damýyn eskere otyryp, ekologııalyq júktemeni azaıtý jáne qaldyqtardy tıimdi basqarý maqsatynda mynadaı naqty usynystardy qarastyrýdy usynamyz.
Birinshiden, elektrondyq saýdada qoldanylatyn bir rettik qaptamany qysqartý boıynsha naqty normatıvtik talaptar engizip, qaıta paıdalanylatyn ári ekologııalyq qaýipsiz qaptama úlesin kezeń-kezeńimen arttyrý.
Ekinshiden, iri onlaın-platformalar men jetkizý kompanııalary úshin qaptama qaldyqtaryn jınaý jáne qaıta óńdeý boıynsha keńeıtilgen ekologııalyq jaýapkershilik mehanızmin engizý.
Úshinshiden, iri qalalarda qaıtarymdy konteınerler, jáshikter jáne kóp ret qoldanylatyn qaptama júıesin engizýge arnalǵan pılottyq jobalardy iske qosý.
Tórtinshiden, qaldyqtardy suryptaý jáne qaıta óńdeý ınfraqurylymyn damytý maqsatynda óńirlerde zamanaýı suryptaý keshenderin kóbeıtip, osy salaǵa ınvestıtsııa tartý úshin ekonomıkalyq yntalandyrý sharalaryn kúsheıtý mańyzdy, — dedi depýtat.
Buǵan deıin habarlanǵandaı, aýyldarda qatty turmystyq qaldyqtardy jınaý jáne shyǵarý júıesi jetildiriledi.
