Onlaın sanaq: Aldyńǵy orynda – Almaty, sońǵy orynda – Mańǵystaý

NUR-SULTAN. QazAqparat – Jalpyulttyq sanaqty eki aptalyq onlaın kezeńinde respondentterdiń basym bóligi sanaq.gov.kz saıtyn paıdalanǵan, dep habarlaıdy QazAqparat tilshisi.

Bul týraly Ulttyq statıstıka bıýrosynyń baspasóz qyzmeti málim etti.

«15 qyrkúıek saǵat 14:00-degi jaǵdaı boıynsha 3 024 216 respondent onlaın sanaqtan ótken. Olardyń 2 607 643-i sanaq.gov.kz saıtynda, 297546 adam Egov portalynda tirkelý arqyly jaýap berse, 119027 adam sanaqqa Aitu qosymshasy arqyly qatysty», - dep jazady vedomstvonyń baspasóz qyzmeti.

Resmı málimet boıynsha onlaın sanaqtyń alǵashqy qorytyndysy boıynsha Almaty oblysy alda keledi.

«Qazirgi ýaqytta Almaty oblysy alda. Munda 313919 turǵyn sanaqtan ótkeni jaıly habarlama alǵan. Almaty qalasynda onlaın sanaqtan ótken 278 432 adam tirkelgen. Úzdik úshtikti Túrkistan oblysy túıindedi. Munda 247175 adam sanaq saýaldaryna onlaın rejımde jaýap berdi. Bul kórsetkish boıynsha ázirge sońǵy eki oryndy Atyraý jáne Mańǵystaý oblystary enshilep tur. Bul óńirlerde sáıkesinshe 79 881 jáne 71 886 adam sanaqtan ótti», - delingen vedomstvonyń aqparatynda.

Al, jergilikti halyq sanyna shaqqanda sanaqtan ótkenderdiń úlesi boıynsha Qyzylorda oblysy alda tur. Munda azamattardyń 28,6%-y onaın sanaqqa qatysqan. 1 tamyzdaǵy jaǵdaı boıynsha óńirde 823 052 turǵyn bar. Bul kórsetkish boıynsha Batys Qazaqstan oblysy ekinshi orynda. Munda turǵyndardyń 24,7% búginge deıin sanaqtan onlaın rejımde ótken. 1 tamyzdaǵy jaǵdaı boıynsha óńirde 749754 adam tirkelgen», - dep jazady Ulttyq statıstıka bıýrosynyń baspasóz qyzmeti.