Onlaın platformalarda alkogol ónimderin satýǵa tyıym salyndy ma
ASTANA. KAZINFORM — Elektrondyq saýda alańdarynda satýǵa tyıym salynǵan jáne shekteý qoıylǵan taýarlardyń biryńǵaı tizimi jarııalanǵannan keıin, el ishinde birqatar suraq týyndady. Bul norma alkogol ónimderin endi ǵalamtor arqyly satýǵa bolmaıdy degendi bildire me jáne mundaı jaǵdaıda zań buzýshylyq úshin kim jaýapty bolady? Atalǵan saýalǵa QR Saýda jáne ıntegratsııa mınıstrligi jaýap berdi.
Alkogol saýdasyna tyıym joq, biraq ony satýdyń talaptary bar
Mınıstrliktiń málimetinshe, «Saýda qyzmetin retteý týraly» zańǵa saı, alkogol ónimderi elektrondyq saýdaǵa tyıym salynatyn taýarlar sanatyna jatpaıdy. Al jarııalanǵan tizbe jańa shekteýler engizbeıdi, tek qoldanystaǵy normalardy júıeleıdi.
Alaıda bul alkogoldi ınternet arqyly eshqandaı talapsyz satýǵa bolady degen sóz emes. Mınıstrlik túsindirgendeı, alkogol ónimderin onlaın satqanda, kásipkerler etıl spırti men alkogol ónimderin óndirý jáne olardyń aınalymyn retteıtin zańnama talaptaryn, sonyń ishinde lıtsenzııalaý jáne ózge de mindettemelerdi oryndaýy kerek.
Jaýapkershilik marketpleıske emes, satýshyǵa júkteledi
Mınıstrlik tarqatqan negizgi másele — marketpleıske taýardy qoıý nemese oǵan tehnıkalyq turǵydan tapsyrys berý zań buzý bolyp sanalmaıdy. Eger qandaı da bir kásipker alkogol ónimderi aınalymyna baılanysty lıtsenzııalyq nemese ózge de talaptardy oryndamasa, jaýapkershilik naqty sol satýshyǵa júkteledi.
— Elektrondyq saýda alańynda taýar týraly aqparatty júkteý nemese oǵan tapsyrys rásimdeýdiń tehnıkalyq múmkindigi bolýy Qazaqstan Respýblıkasynyń zańnamasyn buzý bolyp eseptelmeıdi, — dep atap ótti mınıstrlik.
Naqtylap aıtqanda, marketpleıster nemese jetkizý qyzmetteriniń ıeleri katalogynda alkogol ónimderi bolǵany úshin jaýapkershilikke tartylmaıdy. Bul jerde eń bastysy másele — taýardy onlaın platformalarǵa salǵan satýshynyń zań talaptaryna saı áreket etýi.
Tekserý jáne jaýapkershilikke tartýǵa kim quziretti
Alkogol óndirisi jáne olardyń aınalymy salasyndaǵy talaptardyń saqtalýyn baqylaý — QR Qarjy mınıstrliginiń quzyretindegi is. Dál osy organ lıtsenzııa beredi, mindetti talaptardy belgileıdi jáne Kásipkerlik kodeksine sáıkes tekserýler júrgizedi.
Eger zań buzý anyqtalsa, Ákimshilik quqyq buzýshylyq týraly kodekske sáıkes, ákimshilik jaýapkershilikke tartý da atalǵan memlekettik organ quziretinde.
Al Saýda jáne ıntegratsııa mınıstrligi tek aqparattyq-anyqtamalyq sıpattaǵy tizimdi jasaıdy. Áıtse de, bul tizimniń mindetti zańdyq kúshi joq, bar bolǵany usynymnyń rólin atqarady.
Qoryta aıtqanda, marketpleıster, agregatorlar jáne jetkizý servısteri burynǵy quqyqtyq tártip aıasynda jumysyn jalǵastyra beredi.
Joǵaryda jazǵanymyzdaı, onlaın platformalarda alkogol ónimderin ornalastyrý nemese oǵan tapsyrys rásimdeýge tehnıkalyq múmkindik bolýy zań buzýshylyqqa jatpaıdy. Al alkogol ónimderin tıisti lıtsenzııasyz nemese salalyq zań talaptaryn buza otyryp satatyn satýshylar jaýapkershilikke tartylady.
Aıta keteıik, buǵan deıin Astanada zańsyz alkogol saýdasyna qarsy baqylaý kúsheıtiletinin jazǵanbyz.
