Onlaın-platforma ókildigine quqyqqa qaıshy kontentti joıý jónindegi nusqamany oryndamaǵany úshin jaýapkershilik engizilmek

ASTANA. KAZINFORM — Onlaın-platforma ókildikterine quqyqqa qaıshy kontentti joıý jónindegi ýákiletti organnyń nusqamalaryn oryndamaǵany úshin ákimshilik jaýapkershilik engizilmek. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Aqparat salasynda kıberqaýipsizdikti kúsheıtý baǵytynda búgingi kúnge «Qazaqstan Respýblıkasynyń Ákimshilik quqyq buzýshylyq týraly kodeksine onlaın-platformalar jáne mass-medıa máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine onlaın-platformalar jáne mass-medıa máseleleri boıynsha ózgerister men tolyqtyrýlar engizý týraly» zań jobalary ázirlendi, — dedi Úkimet basshysy.

Onyń málimetinshe, atalǵan zań jobalaryna birqatar mynadaı jańashyl norma engizildi:

— Qazaqstan Respýblıkasynyń aýmaǵynda onlaın-platforma ókildiginiń onlaın-platformada quqyqqa qaıshy kontentti joıý jónindegi ýákiletti organnyń nusqamalaryn oryndamaǵany úshin ákimshilik jaýapkershilik kózdeledi;

— belgili bir salada bilim berý kýrstaryn jáne (nemese) oqytý materıaldaryn qamtıtyn kontentti taratatyn onlaın-platforma paıdalanýshylaryna mundaı kontentti tıisti bilimi bar ekendigi týraly habarlamamen, dıplom jáne (nemese) sertıfıkat derekterin kórsete otyryp súıemeldeý mindeti belgilenedi.

— Osy jyldyń qańtar aıynda zań jobalary Úkimettiń zań shyǵarý jumysynyń qaǵıdalaryna sáıkes múddeli memlekettik organdarǵa kelisýge jiberildi, — dedi Oljas Bektenov.

Buǵan deıin Premer-mınıstr balalardy áleýmettik jelilerdegi zııandy kontentten qorǵaý úshin batyl sheshimder qabyldaýdy tapsyrǵan edi.