Onlaın-ortada abyroı men beıneni qorǵaý: Erjan Sádenov mańyzdy bastama kóterdi
ASTANA. KAZINFORM – Onlaın-ortada sýrettik beınesin zańsyz paıdalanǵany jáne balaǵattaǵany úshin azamattardyń shaǵym berý tártibin jetildirý qajet. Bul týraly Quryltaı depýtattarynyń saýalyna Іshki ister mınıstri Erjan Sádenovtiń jaýabyna aıtylǵan.
Onyń málimetinshe, azamattardyń abyroıyn, qadir-qasıetin jáne beınesin qorǵaý Qazaqstan Respýblıkasy Azamattyq kodeksiniń 145-babymen qamtamasyz etiledi. Atalǵan bapqa sáıkes, adamnyń beınesin onyń kelisiminsiz paıdalanýǵa jol berilmeıdi.
- Sot arqyly qorǵaýdyń qoldanystaǵy tetikteri jáne QR QK men ÁQBtK normalary azamattardyń bedeline nuqsan keltiretin málimetterdi taratýdy tıimdi túrde toqtatýǵa múmkindik beredi, - dedi ol.
Mınıstr sonymen qatar tikeleı efırlerdiń erekshelikterin eskere otyryp, onlaın keńistiktegi quqyq buzýshylyqtarǵa qatysty shaǵymdardy qaraý tártibin jetildirý qajet ekenin atap ótti. Atap aıtqanda, Mádenıet jáne aqparat mınıstrligine azamattardyń sýrettik beınesin zańsyz paıdalanýǵa jáne olardy balaǵattaýǵa baılanysty shaǵym berý tártibin jetildirý, sondaı-aq azamattardyń negizdi ótinishterine onlaın-platformalardyń jaýap berý merzimderin qysqartý máselesin qarastyrý usyndy. Sondaı-aq kámeletke tolmaǵandardy zııandy kontentten qorǵaýǵa da erekshe nazar aýdarý qajet ekenin atap ótti.
Buǵan deıin Quryltaı depýtaty Jarqynbek Amantaıuly «tresh-strımıng» uǵymyn zańnamalyq turǵydan naqty aıqyndap, zorlyq-zombylyqty, qaýipti prankterdi, qorlaý men ádeıi arandatýshy áreketterdi tikeleı efırde nasıhattaǵany úshin jaýapkershilikti kúsheıtýdi usynǵan edi.
