Onlaın oqıtyn stýdentterdiń oqý aqysy arzandaı ma - mınıstr jaýaby

NUR-SULTAN. QazAqparat - QR Bilim jáne ǵylym mınıstrligi bergen tapsyrmaǵa sáıkes barlyq joǵary oqý oryndary qosymsha shyǵyndarǵa ushyrap jatyr. Bul týraly Ortalyq kommýnıkatsııalar qyzmetinde onlaın ótken brıfıngte QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Joǵary oqý oryndaryna akademııalyq jáne qarjylyq derbestik berilgen, sondyqtan oqý aqysy qansha bolatyny týraly máseleni ár ınstıtýt, ár ýnıversıtet, ár akademııa ózi sheshedi. Qashyqtan oqytqanda shyǵyn az bolady degen túsinik bar. Negizinde olaı emes, mysaly oqý ornynda 5 korpýs bolsa, beseýi de jabylmaıdy. Onyń kommýnaldyq shyǵyndary, jumys istep jatqan oqytýshylardyń shyǵyndary bar», - deıdi Bilim jáne ǵylym mınıstri Ashat Aımaǵambetov.

Onyń aıtýynsha, qashyqtan oqý rejımine kóshkenge deıin joǵary oqý oryndarynda qashyqtan oqý júıeleri, tehnologııalary bolmaǵan.

«Sondyqtan olar qazirgi ýaqytta arnaıy shyǵyndanyp, arnaıy júıelerdi satyp alyp jatyr. Internet kúshin keńeıtýde. Biz bergen tapsyrmaǵa sáıkes barlyq joǵary oqý oryndary qosymsha shyǵyndarǵa ushyrap jatyr. Bul mınıstrlik emes, ár ýnıversıtet ózi sheshetin másele», - deıdi ol.