Onlaın medıtsınalyq qyzmetterdiń aýqymy keńeıedi
ASTANA. KAZINFORM — Densaýlyq saqtaý mınıstrligi medıtsınalyq qyzmetterdi qashyqtan uıymdastyrý, usyný jáne aqy tóleý qaǵıdalaryna túzetýler jobasyn ázirledi.
– Qazaqstanda qashyqtyqtan alýǵa bolatyn medıtsınalyq qyzmetterdiń tizbesin keńeıtý josparlanyp otyr. Densaýlyq saqtaý mınıstrligi qandaı konsýltatsııalar men dıagnostıkalyq zertteýlerdi onlaın formatta júrgizýge bolatynyn aıqyndaıtyn, sondaı-aq mundaı qyzmetterdiń sapasy men qaýipsizdigine qoıylatyn biryńǵaı talaptardy belgileıtin buıryq jobasyn ázirledi, – delingen qujatta.
Joba qashyqtyqtan medıtsınalyq kómek kórsetý júıesin damytýdy kózdeıdi jáne densaýlyq saqtaý salasynda zamanaýı tsıfrlyq tehnologııalardy paıdalaný múmkindikterin arttyrady. Atap aıtqanda, jobada alǵash ret qashyqtyqtan formatta kórsetilýi múmkin medıtsınalyq qyzmetterdiń tizbesi, sondaı-aq nátıjelerin dáriger onlaın rejıminde sıpattap, túsindire alatyn dıagnostıkalyq zertteýlerdiń tizbesi bekitiledi.
Budan basqa, qujat telemedıtsınalyq qyzmetterdi kórsetý kezinde qoldanylatyn tehnologııalardy aıqyndap, olardy usyný sharttaryn keńeıtedi.
– Ózgerister joǵary sapa men qaýipsizdik talaptaryn saqtaı otyryp, medıtsınalyq kómekti patsıentter úshin qoljetimdirek ári yńǵaılyraq etý maqsatynda engizilip otyr. Bul rette jańa normalar dárigerdiń qabyldaýyn tolyǵymen almastyrmaıdy. Eger patsıentke medıtsınalyq uıymda qarap tekserý, tekserýden ótý nemese emdelý qajet bolsa, kómek burynǵysynsha dástúrli formatta kórsetiledi. Qashyqtyqtan medıtsınalyq qyzmetter tek medıtsınalyq turǵydan ruqsat etilgen jáne belgilengen talaptarǵa saı keletin jaǵdaılarda ǵana qoldanylady, – delingen qujatta.
Jobaǵa saı, jańartylǵan erejeler eldiń barlyq óńiriniń, onyń ishinde aýyldyq eldi mekender turǵyndarynyń, qozǵalysy shekteýli adamdardyń, sondaı-aq dınamıkalyq baqylaýdy nemese qaıtalanatyn konsýltatsııany qajet etetin naýqastardyń medıtsınalyq kómekke qoljetimdiligin arttyrýǵa múmkindik beredi.
Qujattyń teris áleýmettik-ekonomıkalyq nemese quqyqtyq saldary bolmaıdy.
Sonymen qatar ol shalǵaıdaǵy halyqqa onlaın medıtsınalyq kómek alýǵa jáne bilikti medıtsınalyq qyzmetterdiń qoljetimdiligin arttyrýǵa jol ashady.
Bul norma qabyldansa, 2026 jyly telemedıtsına arqyly medıtsınalyq qyzmetterge qoljetimdilikti 10%-ǵa ósiredi.
Joba qoǵamdyq talqylaý úshin 18 tamyzǵa deıin «Ashyq NQA» portalynda jarııalandy.
Aıta keteıik, buǵan deıin Qazaqstanda medıtsınalyq saraptamaǵa elektrondy kezek engizilgenin jazǵanbyz.
